513 ދުވަހަށް ފަހު މިއަދު ރައީސް މުއިއްޒު ގެންދަވަނީ ނޫސްވެރިންނާއި ބައްދަލުރައްވަމުންނެވެ. މިއަދު ހެނދުނު 10:00 ގައި ފެށީ ނޫސްވެރިންގެ ބައްދަލުވުން ކުރިޔަށްދާ ތާ މީހާރުވަނީ 10 ގަޑިއިރަށް ވުރެ ގިނައިރުވެފައެވެ.
އާރަށަށް ރައީސް މިހާތާނަށް ކުރެއްވި ދަތުރުފުޅުގައި މައުލޫމާތު ހާމަކުރަން އެދުމުން އެކަން ހާމަކުރަން ޑިފެންސް މިނިސްޓްރީން ދެކޮޅު ހައްދަވާފައި ވަނިކޮށް ރައީސް މުއިއްޒު ވަނީ އެ މައުލޫމާތު މިއަދު ވަނީ ހާމަކުރައްވާފައެވެ.
ނޫސްވެރިންނަށް މައުލޫމާތު ދެއްވަމުން ރައީސް މުއިއްޒު ވިދާޅުވީ ވެރިކަމަށް ވަޑައިގަތުމަށްފަހު މިހާތަނަށް 116 ފަހަރުގެ އާރަށަށް ވަޑައިގެންފައިވާކަމަށެވެ. އޭގެތެރެއިން 85 ފަހަރު އެ ރަށަށް ވަޑައިގަތީ "ހަމައެކަނި ފުޓުބޯޅަ ކުޅެން" ކަމަށެވެ. އެއީ ދެކޮޅަށް ތިން ގަޑިއެއްހާއިރުގެ ދަތުރެއްކަމަށް ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވި ގޮތުގައި އެ މަނިކުފާނުގެ އާއިލާއާ އެކު އާރަށަށް މިހާތަނަށް ވަޑައިގަތީ 31 ފަަހަރު ކަމަށެވެ. އެގޮތުން ބައެއް ހުކުރު ދުވަސްތަކުގައިވެސް އާއިލާގެ ބޭފުޅުން އާރަށަށް ވަޑައިގެންފައިވާނެކަމަށް ރައީސް ވިދާޅުވިއެވެ. ރައީސް ވަނީ އާރަށް ކުރެއްވި ދަތުރުގެ ލޯންޗު ދަތުރުތަކަށް ހިނގާފައިވާ ހަރަދުތައްވެސް ހާމަކުރައްވާފައެވެ.
މުލިއާގޭ ކެއުމަށް އަގުބޮޑެތި ތަކެތި ގަންކަމަށް ބުނެ ސޯޝަލް މީޑިއާގައި އާއްމުވި ބިލާއި ގުޅޭގޮތުންވެސް ރައީސް މުއިއްޒު މިއަދު ވަނީ މައުލޫމާތު ހިއްސާކުރައްވާފަ އެވެ. ރައީސް ވިދާޅުވީ އާރަށަށް ދިޔަ ނަމަވެސް ކެއުން ގެންދަނީ މުލިއާގެއިން ކަމަށާއި ވެރިކަމަށް އައި ފަހުން މުލިއާގޭ ކެއުމަށް މިހާތަނަށް ހަރަދުވީ ޖުމްލަ 741،268.1 ރުފިޔާކަމަށެވެ.
"ދެން މި އަހަރުގެ އޭޕްރިލް މަހުގެ 30 އާ ހަމައަށް މުލިއާގޭގެ ކެއުމަށް ހަރަދުވެފައި ވަނީ 175،564.17 ރުފިޔާ." ރައީސް ވިދާޅުވި އެވެ.
ރައީސް އާރަށަށް ދަތުރުކުރެއްވި އަދަދު ހޯދަން އާއްމު ރައްޔިތަކު އެދުމުން އެ މައުލޫމާތު ޑިފެންސް މިނިސްޓްރީން ދޭން ވަނީ ދެކޮޅު ހަދާފަ އެވެ. އަދި އެ މައުލޫމާތު ހޯދަން އެދުނު ފަރާތުގެ މައްސަލަ ތަހުގީގުކުރާނެކަމަށް ވަނީ ބުނެފަ އެވެ.
