މި ބައްދަލުވުން ފުރަތަމަ ތާވަލުކޮށްފައިވަނީ މިއަދު ހެނދުނު 11:00 އަށެވެ. ނަމަވެސް ފަހުން އެ ބައްދަލުވުން 1:00 އަށް ލަސްކުރުމަށްފަހު، ވަގުތު ކުޑަތަންވެފައި އޮއްވައި ކޮމިޓީ ވަނީ ކެންސަލްކޮށްފައެވެ. މި ބައްދަލުވުން ކެންސަލްކުރި ސަބަބެއް މަޖިލީހުގެ އިދާރާއިން ހާމަކޮށްފައެއް ނުވެއެވެ.
ޖޭއެސްސީން ދެ ފަނޑިޔާރުން ވަކިކުރަން ފެންނަ ކަމަށް ނިންމީ އާދިއްތަ ދުވަހުއެވެ. އަދި އެ މައްސަލަ މަޖިލީހަށް ހުށަހެޅުމުން ދިރާސާކޮށް ގޮތެއް ނިންމުމަށް ޖުޑިޝަރީ ކޮމިޓީއަށް ފޮނުވީ ހޯމަ ދުވަހުއެވެ. ކޮމިޓީން ބޭއްވި ފުރަތަމަ ބައްދަލުވުމުގައި ނިންމީ ޖޭއެސްސީން ފޮނުވި ރިޕޯޓާއި ލިޔެކިޔުންތައް ދިރާސާކުރުމަށްފަހު އެ މައްސަލައިގެ ކޮމިޓީ މަރުހަލާ ކުރިއަށް ގެންދާނެ ގޮތެއް ނިންމުމަށެވެ. އަދި މި މައްސަލައިގައި ދެ ފަނޑިޔާރުން ވެސް ޖަވާބު ދާރީ ވާން އެދިފައިވާއިރު، ފަނޑިޔާރުން ހާޒިރު ކުރުމާމެދު ގޮތެއް ނިންމާނީ ދިރާސާއަށްފަހު ކަމަށް ބުދަ ދުވަހު ކޮމެޓީން ވަނީ ފާސްކޮށްފައެވެ.
ފަނޑިޔާރުންތަކެއްގެ މައްސަލަ ބަލަން ފެށީ މަޖިލީހުގެ މެންބަރުން އިންތިހާބުވި ޕާޓީން ވަކިވުމުންނާއި ވަކިކުރުމުން ވެސް ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލުކުރަން އެދި ހުށަހަޅާފައި އޮތް މައްސަލަ ބަލަމުން އަންނަނިކޮށެވެ.
