މިދިޔަ ފަސްއަހަރު އިދިކޮޅުގައި ތިބިއިރު އެމްޑީޕީ ވެރިކަން ވައްޓާލަން މަސައްކަތެއް ނުކުރާކަމަށާއި މި ވެރިކަންވެސް 5 އަހަރަށް ކުރުމުގެ ފުރުސަތު ދޭންޖެހޭކަމަށް ވެރިކަންކުރާ ޕީއެންސީއަށް ނިސްބަތްވާ މަހިބަދޫ ދާއިރާގެ މެމްބަރު އަހްމަދު ތާރިގް ވިދާޅުވެއްޖެއެވެ.
Advertisement
މިއަދު ރައްޔިތުން މަޖިލީހުގައި ވާހަކަ ދައްވަމުން މެމްބަރު ތާރިގު ވިދާޅުވީ ރާއްޖެއާއި ކައިތިން އިންޑިއާއާއި ޕާކިސްތާނު ތޮޅެމުންދާ މި ދަނޑިވަޅަކީ ސިޔާސީ ގޮތުން މަގުމައްޗަށް ނުކުމެ ހަލަބޮލިކަން ގެންނަވީ ވަގުތެއް ނޫންކަމަށެވެ. އެގޮތުން ޕީޕީއެމް، ޕީއެންސީ އިދިކޮޅުގައި އޮތް އިރު އެމްޑީޕީގެ ވެރިކަން ވައްޓާލަން މަސައްކަތް ނުކުރައްވާކަމަށާއި ހަމައެކަނި ދެއްކީ އޭރު ސަރުކާރުން ކުރި ގޯސްކަންތަކުގެ ވާހަކަތައް އެކަނިކަމަށް ތާރިގު ވިދާޅުވިއެވެ. އަދި ގައުމު ހަލަބޮލިކޮށް އެތެރޭގެމަސްލަހަތު ނަގާލުމަކީ މި ގައުމަށްޓަކައި ކުރެވޭނެ އެންމެ ނުބައި ކަންތައްކަމަށެވެ.
" މި ބޭފުޅުންނަށް ވެރިކަން ފަސް އަހަރު ދުވަހު ލިބުނު. އަޅުގަނޑުމެންނެއް އެ ވެރިކަން ވައްޓާލަން އިދިކޮޅުގައި ތިބި އިރު މަސައްކަތެއް ނުކުރަން. އަޅުގަނޑުމެން ދެއްކީ އޭރުގެ ވެރިކަން ކުރަމުންދިޔައިރު ގޯސްކޮށް ހިނގާފައި ހުރި ކަންތައްތަކުގެ ވާހަކަ. އަޅުގަނޑުމެން ދެއްކީ ސަރުކާރުގެ ނިޒާމުތަކުގެ ތެރޭގައި ހުރި ގޯސްތަކުގެ ވާހަކަ." ތާރިގު ވިދާޅުވިއެވެ.
ތާރީގް ވިދާޅުވީ ރައްޔިތުން މި ވެރިކަން ގެނާއި އޭރުގެ އިދިކޮޅުގައި އޮތް ޕީޕީއެމް ޕީއެންސީން ދެއްކި ވާހަކަތައް އަޑުއަހައިގެންކަމަށެވެ. އެހެންކަމުން މި ވެރިކަންކުރަން ފަސްއަހަރު ދީ ވޯޓް އަންނަން ދެން މަޑުކުރަން ތާރިގު ވަނީ އެމްޑީޕީއަށް ގޮވާލާފައެވެ.
" އަޅުގަނޑުމެން ދެއްކި ވާހަކަ ގަބޫލުކޮށް ރައްޔިތުން އަޅުނޑުމެންނާއި ވެރިކަން ހަވާލުކުރީ. އެހެންވީމާ މި ވެރިކަން ކުރުމަށްޓަކައި އަޅުގަނޑުމެންނަށް ފަސް އަހަރުގެ ދައުރެއް ފަސް އަހަރުގެ ވަގުތު ރައީސް މުއިއްޒަށް ދެއްވަން ވާނެ. ފަސްއަހަރު ވީމާ ނޫނީ ފަސް އަހަރު ވާން ދިޔައީމައި އަނެއްކާ އަޅުގަނޑުމެން ދާނީ ރައްޔިތުން ކައިރިޔަށް. ..... އެއީ ކީ އިދިކޮޅު ޕާޓީ މަގުމައްޗަށް ނުކުމެ ހަރަކާތްކޮށްގެން ނުވަތަ އެހެން ގޮތްގޮތުން މި ސަރުކާރާ ތޮޅެންޖެހޭ ކަމެެއް ނޫން.." ތާރިގް ވިދާޅުވިއެވެ.
ތާރީގު ވިދާޅުވީ ދޭތެރެ މެދުން ވެރިކަން ވެއްޓުމަކީ ގައުމަށް ލިބިގެންދާނެ ގެއްލުމެއްކަން އެކަން ދިމާވެފައިވާ އެމްޑީޕީން ގަބޫލުކުރަން ޖެހޭނެކަަމަށެވެ. އެހެންކަމުން އެގޮތަށް މަސައްކަތް ނުކުރުމަށް ތާރިގް ވަނީ އިދިކޮޅު އެމްޑީޕީއަށް ގޮވާލާފައެވެ.
