ރައްޔިތުން މަޖިލީހުގައި ވާހަކަ ދައްކަވަމުން މިނިސްޓަރު ހައިދަރު ވިދާޅުވީ ސްޓޫޑަންޓް ލޯނުގައި ކިޔެވުމަށްފަހު އެ ފައިސާ އަނބުރާ ދައްކަނީ 40 އިންސައްތަ ދަރިވަރިންކަމަށެވެ.
އެ ފައިސާއަކީ ދައުލަތަށް ލިބެންޖެހޭ ފައިސާކަން ފާހަގަކުރައްވަމުން މިނިސްޓަރު ހައިދަރު ވިދާޅުވީ އެ ފައިސާ ހޯދުމަށް މިނިސްޓްރީން ކުރަން ޖެހޭ މަޝްވަރާތައްކޮށް، ވަރަށް އަވަހަށް އެކަމަށް ގޮތެއް ނިންމާނެ ކަމަށެވެ. އަދި އެ މަސައްކަތް މިހާރު ފަށާފައިވާކަމަށްވެސް މިނިސްޓަރު ހައިދަރު ވިދާޅުވިއެވެ.
ސްޓޫޑަންޓް ލޯނުގައި ކިޔަވަމުންދާ ދަރިވަރުން އެ ކުދިންނަށް ލިބެންޖެހޭ ފައިސާ ނުލިބި ކިޔެވުމަށް ހުރަސްތައް އެޅުމުގެ ޝަކުވާތައް ވަނީ އިތުރުވެފައެވެ. އަދި މިނިސްޓްރީން އެ ކުދިން ޝަކުވާތަކަށް ޖަވާބު ނުދޭކަމަށްވެސް ގިނަ އަދަދެއްގެ ކުދިން އަންނަނީ ބުނަމުންނެވެ.
ސްޓޫޑަންޓް ލޯނުތަކަކީ އިސްލާމީ ހަމަތަކަށް ފެތޭ ލޯންތަކަކަށް ހެއްދެވުމަށް ރައީސް މުއިއްޒު ވަނީ ނިންމާފައެވެ. މި ބަދަލާއި އެކު ލޯނުގައި ހިމެނޭ އެޑްމިނިސްޓްރޭޓިވް ފީ އުނިކުރުމަށްވަނީ ނިންމާފައެވެ.
