ފަނޑިޔާރުން ވަކިކުރުމުގެ ކަންތަކުގައި އޭޖީ އުޝާމް ދޮގުހެދީ، ރޭ ގައުމީ ޓީވީން ވަގުތުން ފޮނުވި އަހާ ޕްރޮގްރާމްގެ ތެރެއިން އަމާޒުވި ސުވާލަކަށް ޖަވާބު ދެމުންނެވެ.
އުޝާމް ރޭ ގައުމީ ޓީވީގައި ހެދި ދޮގަކީ، މަޖިލިސް މެންބަރުންގެ ގޮނޑި ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭ ގޮތަށް ގާނޫނުއަސާސީއަށް ގެނައި ބަދަލުތައް ބާތިލު ކުރަން ސުޕްރީމް ކޯޓަށް ހުށަހެޅި މައްސަލައާ ގުޅިގެން ފަނޑިޔާރު، އަޒްމިރަލްދާ ޒާހިރުއަށް މީހަކު މެދުވެރިކޮށް ނުފޫޒު ފޯރުވި ކަމަށް ވިދާޅުވާ ވާހަކައަކީ ރައްޓެއްސެއްގެ ގާތުގައި، އެ މައްސަލަ ތާވަލު ވެސް ނުކުރަނީސް ދެއްކެވި ވާހަކައެއް ކަމަށް ވިދާޅުވެ، ހެދި ދޮގެވެ.
އުޝާމް އެހެން ވިދާޅުވި ނަމަވެސް ގާނޫނުއަސާސީ ބަދަލު ކުރި މައްސަލަ މިދިޔަ އަހަރުގެ ނޮވެމްބަރު މަހު ސުޕްރީމް ކޯޓަށް ހުށަހަޅާފައިވާއިރު، އެ މައްސަލައިގެ އަޑު އެހުން ތާވަލު ކުރީ ޖަނަވަރީ މަހުގެ 30 ވަނަ ދުވަހުއެވެ. އެއީ އުޝާމް އެ ވިދާޅުވާ ރައްޓެއްސަކާ އުޝާމް ބައްދަލުކުރުމުގެ ކުރިންނެވެ.
ސުޕްރީމް ކޯޓުގެ ފަނޑިޔާރުން ވަކިކުރުމުގެ ކަންތައް ދިފާއު ކުރުމަށް އުޝާމް ދޮގު ހެދިއިރު، ރައްޔިތުންގެ މަޖިލީހުގެ ޖުޑިޝަރީ ކޮމިޓީގެ މުގައްރިރު ހުސްނީ މުބާރަކްވެސްވަނީ ފަނޑިޔާރުން ވަކިކުރުމުގެ ކަންކަން ދިފާއު ކުރުމަށް ދޮގު ހަދާފައެވެ.
