ރައްޔިތުންނާ އެކު ޕޮޑްކާސްޓުގައި ވާހަކަފުޅު ދައްކަވަމުން، ގާނޫނު އަސާސީއަށް ގެންނަންޖެހޭ އިސްލާހުތަކުގެ ތެރޭގައި ރައްޔިތުންގެ ބާރުވެރިކަން ވަރުގަދަކޮށް، ޔަގީންކަމާއި ކަށަވަރުކަން އިތުރުވާ ގޮތަށް ރާއްޖޭގެ ކަންކަން ބައްޓަންކުރެވޭނެ ކަމަށް ރައީސް ވިދާޅުވިއެވެ.
ރައީސް މުއިއްޒު ވިދާޅުވީ ރައްޔިތުންގެ ވޯޓުން އިންތިހާބުކުރާ ރައްޔިތުންގެ މަޖިލިހުގެ މެމްބަރެއް ނުވަތަ ކައުންސިލް މެމްބަރެއް އެ މަގާމުގައި ބަހައްޓަން ބޭނުން ނުވާނަމަ ރައްޔިތުންގެ ވޯޓަކުން ވަކިކުރެވޭ ގޮތަށް ހަދައި އިސްލާހުކުރުމަށް ހުށަހަޅުއްވާ ކަމަށެވެ.
ރައީސް މުއިއްޒު އިތުރަށް ވިދާޅުވީ މިހާރު ޗެކް އެންޑް ބެލެންސްއެއް ނެތި، އިންތިހާބުވާ ފަރާތްތަކަށް ފަސް އަހަރު ވަންދެން މަގާމުގައި ތިބެވޭ ގޮތަށް އޮތުމަކީ އެންމެ އިންސާފުވެރި ގޮތް ނޫން ކަމަށެވެ. މީގެ އިތުރުން ދެން އޮންނަ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށް ބޭއްވުމަށާއި އަތޮޅު ކައުންސިލް އުވާލައި ރަށު ކައުންސިލަރުންގެ އަދަދު މަދުކުރުމަށް ވެސް ހުށަހަޅުއްވާނެ ކަމަށް ރައީސް މުއިއްޒު ވަނީ ވިދާޅުވެފައެވެ.
