ނަޒީފު މިހެން ވިދާޅުވީ ސީއެންއެމް އިން ގެނެސްދޭ "ނޭޝަން ޓޯކް" ޕޮޓްކާސްޓު ގައި ވާހަކަ ދައްކަވަމުންނެވެ.
"ސީއެންއެމް" އިން އަންނަނީ ދައުލަތް ނުވަތަ ސަރުކާރު ހިންގުމަށް މިހާރުއޮތް އޮނިގަނޑު ބަދަލުކޮށް، ބޮޑުންގެ ގޭދޮށުގައި މުގޯލި އަޅަން ނުޖެހި ދިރިއުޅެވޭނެކަން ކަށަވަރުވާ ފަދަ ހިންގުމުގެ އާ އޮނިގަނޑެއް ހޯދުމަށް ރައްޔިތުން ހޭލުންތެރި ކުރުމަށް މަސައްކަތްތަކެއް ކުރަމުން ނެވެ.
"ނޭޝަން ޓޯކް"ގެ 18 ވަނަ ޕްރޮގްރާމްގައި ވާހަކަ ދައްކަވަމުން ނަޒީފު ވިދާޅުވީ ސަރަހައްދީ ތަރައްގީއަށް ގޮސްގެން ނޫނީ ރާއްޖެ އަށް މުސްތަގުބަލެއް ނެތް ކަމަށާއި ތަރައްގީގެ ދުރު ރާސްތާ އަށް ވިސްނާއިރު މިހާރުއޮތް އަތޮޅު ތަކުގެ "އެތުރުން" ބަދަލުވާން ޖެހޭ ކަމަށެވެ.
ނަޒީފު ވިދާޅުވީ ސަރުކާރުތަކުގެ ވިސްނުން އަދި ވެސް ހުރީ ވަސީލަތްތައް އެއްތަނަކަށް ޖަމާކުރުން ކަމަށާއި ލެގެސީ އަކަށް ކުރާކަމަކީ ތަންތަން ހިއްކުން ކަމަށެވެ. ނަޒީފް ވިދާޅުވީ ސަރަހައްދީ ތަރައްގީއަށް ގޮސް ރާއްޖޭގައި ހުރި ރިސޯސްތަކަކީ ކޮބާކަން ދެނެގަނެވެން ޖެހޭ ކަމަށާއި އަދި ކޮންތާކު ހުރީ ކޮންވަސީލަތެއްތޯ ބަލާ މިހުރިހާ ވާހަކަތަކެއް އެއް މޭޒަކަށް ގެނެސް ފުޅާ ދާއިރާއެއްގައި އިލްމީ ބަހުސް ކުރުން މުހިންމު ވެއްޖެ ކަމަށެވެ.
ސަރަހައްދީ ހިންގުން އަލުން ތަރުތީބު ކުރުން މުހިން ކަމަށް ބުނާ މީހުން ގިނަ ވެއްޖެ
ނަޒީފު އިތުރަށް ވިދާޅުވީ ރާއްޖޭގެ އެކި ސަރަހައްދުތަކުގައި އެއާޕޯޓްތައް ހެދުމަކީ މައްސަލައެއް ނޫން ކަމަށާއި އަދި ދަތުރުފަތުރުގެ ނިޒާމަށް ވެސް އެއީ މުހިންމު މަސައްކަތެއް ކަމަށާއި އެހެން ނަމަވެސް އެއާޕޯޓްތައް ހެދެނީ ދުރު މުސްތަގުބަލުގެ ތަރައްގީގެ ޕްލޭނެއް އޮވެގެން ނޫން ކަމަށެވެ. އަދި ވިދާޅުވީ މިހާރު އާބާދީގެ ޓްރެންޑް ހުރިގޮތުން ކުރިއަށްއޮތް ތަނުގައި ރާއްޖޭގެ ވަރަށް ގިނަ ރަށްތަކުގައި މީހުން ނޫޅެ ދާނެ ކަމަށެވެ.
