ޓޫރިޒަމް މިނިސްޓްރީގެ ތަފާސް ހިސާބުތަކުން އެނގޭ ގޮތުގައި މި އަދަދާއެކު ރަޝިއާ އޮތީ ރާއްޖޭގެ ޓޫރިޒަމް މާކެޓްގެ ދެވަނައިގައެވެ. ޗައިނާއިން 108,128 ޓޫރިސްޓުން ޒިޔާރަތްކޮށް އެންމެ މަތީ ސަފުގައި އޮތްއިރު، ރަޝިއާއިން ޒިޔާރަތްކޮށްފައިވަނީ 100,096 ޓޫރިސްޓުންނެވެ.
ރާއްޖެއަށް މި އަހަރުގެ މިހާތަނަށް ޖުމުލަ 926,898 ޓޫރިސްޓުން ޒިޔާރަތްކޮށްފައިވާއިރު، އޭގެ ތެރެއިން 10.8 ޕަސަންޓަކީ ރަޝިއާގެ ޓޫރިސްޓުންނެވެ. ތިންވަނައިގައި އިނގިރޭސިވިލާތް ހިމެނޭއިރު އެ ގައުމުން ޒިޔާރަތްކޮށްފައިވަނީ 95,019 ޓޫރިސްޓުންނެވެ. ފާއިތުވި 2023 ވަނަ އަހަރު ރަޝިއާގެ އެއްލައްކަ ވަނަ ޓޫރިސްޓު ޒިޔާރަތްކޮށްފައިވަނީ ޖޫން މަހުއެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން، ރާއްޖެއަށް މި އަހަރު ޒިޔާރަތްކުރި ޓޫރިސްޓުންގެ ތެރެއިން 660,071 ޓޫރިސްޓުން (71.2 ޕަސަންޓް) ޗުއްޓީ ހޭދަކޮށްފައިވަނީ ރިސޯޓުތަކުގައެވެ. ގެސްޓްހައުސްތަކުގައި 216,094 ޓޫރިސްޓުން (23.3 ޕަސަންޓް) ޗުއްޓީ ހޭދަކޮށްފައިވާއިރު ހޮޓާތަކުގައި 27,291 ޓޫރިސްޓުން އަދި ޓޫރިސްޓް އުޅަނދުތަކުގައި 22,853 ޓޫރިސްޓުން ޗުއްޓީ ހޭދަކޮށްފައިވެއެވެ.
