ބާސެލޯ ނަސަންދުރާގައި ބޭއްވި ރަސްމިއްޔާތުގައި ޝަރީފު ވިދާޅުވީ، އެ ބޭންކުގައި ކަސްޓަމަރުގެ ޑިޕޮސިޓް 32 ބިލިއަން ރުފިޔާއަށް އަރާ ކަމަށެވެ. އޭނާ ވިދާޅުވީ، ޑިޕޮސިޓްގެ އިތުރުން ބޭންކުން ދޫކޮށްފައިވާ ލޯނުގެ އަދަދު 21.1 ބިލިއަން ރުފިޔާއަށް އަރާ ކަމަށެވެ.
ޝަރީފު ވިދާޅުވީ، މިދިޔަ އަހަރުގެ ކާމިޔާބީތައް މިއަހަރުވެސް ބޭންކުން ހިފަހައްޓާނެ ކަމަށާއި މިއަހަރުގެ ފުރަތަމަ ކުއާޓާގައި އެކަނި އެބޭންކުން އާންމުންނާއި ވިޔަފާރިތަކަށް 1.7 ބިލިއަން ރުފިޔާގެ ލޯނު ދޫކޮށްފައިވާ ކަމަށެވެ. އެއީ މިދިޔަ އަހަރުގެ ފުރަތަމަ ކުއާޓާއަށް ވުރެ 72 ޕަސެންޓުގެ ކުރިއެރުމެކެވެ.
ބީއެމްއެލް އުފެއްދީ 10 މިލިއަން ރުފިޔާގެ ކެޕިޓަލަކުން ކަން ފާހަގަކުރައްވައި، ޝަރީފް ވިދާޅުވީ ހަރުދަނާ މިންގަނޑެއްގައި ފައިދާ އަލުން އިންވެސްޓްކުރަމުން ދިއުމުގެ ސަބަބުން މިއަދު ބޭންކުގެ ކެޕިޓަލް 14 ބިލިއަން ރުފިޔާއަށް ވުރެ މައްޗަށް އަރައިފައިވާ ކަމަށެވެ.
ޝަރީފް ވިދާޅުވީ ބޭންކުގެ ރައުސުލްމާލު ވަރުގަދަކުރުމަކީ ޑިޕޮސިޓަރުން ރައްކާތެރިކުރުމަށާއި، ވަރުގަދަ މާލީ ބިންގަލެއް އެޅުމަށާއި، އިގްތިސާދީ ގޮންޖެހުންތަކާ ކުރިމަތިލައި، ދިގު މުއްދަތަކަށް ފައިދާ ދެމެހެއްޓުމަށް މަގުފަހިކުރަން މުހިންމު ކަމެއް ކަމަށެވެ.
- އިތުރަށް ކިޔާލަން: ހިއްސާއަކަށް 55ރ. ބަހަން ބީއެމްއެލް އިން ނިންމައިފި
މިދިޔަ އަހަރު ބޭންކުން ވަނީ 643 މިލިއަން ރުފިޔާގެ ޓެކްސް ދައްކާ، ސާފު ފައިދާގެ ގޮތުގައި 2.25 ބިލިއަން ރުފިޔާ ހޯދާފަ އެވެ. އެއީ އޭގެ ކުރީ އަހަރަށްވުރެ އަށް ޕަސެންޓުގެ އިތުރުވުމެކެވެ.
