ޕޯސްޓް އޮފީހުން ފޭސްބުކްގައި ކުރި ޕޯސްޓެއްގައި ވަނީ އެއްވެސް ހާލެއްގައި ޑެލިވަރީ އެޑްރެސް ހޯދުމަށް ކަސްޓަމަރުންނަށް މެސެޖު ނުކުރާނެ ކަމަށް ބުނެފަ އެވެ.
ޕޯސްޓުގެ ނަމުގައި ފޮނުވާ މެސެޖުތަކުގައި ވަނީ ޕެކޭޖު ޑެލިވަރީ ކުރުމަށް ވަރަށް މަސައްކަތްކޮށްފައިވާ ނަމަވެސް ނުބައި އެޑްރެހެއް ދީފައި އޮތުމުން ޑެލިވަރީ ނުކުރެވުނު ކަމަށް ބުނެފަ އެވެ. މީގެ އިތުރުން މެސެޖު ލިބޭތާ ހަ ގަޑިއިރުގެ ތެރޭގައި ޑެލިވަރީ އެޑްރެސް ރަނގަޅު ކުރުމަށް އަންގައި ލިންކެއްވެސް ހިމަނައިފައިވާއިރު، އެ ވަގުތުގެ ތެރޭގައި އެޑްރެސް އަޕްޑޭޓް ނުކޮށްފި ނަމަ ފީއެއް ނަގާނެ ކަމަށް ވެސް ބުނެފައިވެ އެވެ.
މަކަރާއި ހީލަތުން ފައިސާ ހޯދުމުގެ މައްސަލަތައް އިތުރުވަމުން އަންނައިރު މީގެ ކުރިން ވެސް ވަނީ ސަރުކާރުގެ އެކި ކުންފުނިތަކުގެ ނަމުގައި މިފަދަ ލިންކްތައް ފޮނުވައިފައިވާ ކަމަށް ފާހަގަކޮށްފައިވެ އެވެ.
