މުލީ ކައުންސިލުން، އެ އަތޮޅު ރަތްމަންދޫ މީހުންނަށް ގޯތި ދޭން ނިންމީ، ރަތްމަންދޫ މީހުން އެހެން ރަށަކަށް ބަދަލުކޮށްދިނުމަށް އެދި އެ ރަށުގެ ގިނަ ބަޔަކު ރައީސްއަށް ޕެޓިޝަނެއް ހުށަހަޅާފައިވަނިކޮށެވެ. ސަރުކާރުންވެސްވަނީ ރަތްމަންދޫ މީހުން އެހެން ރަށަކަށް ބަދަލުކުރުމަށް ނިންމައި އެކަން އާއްމުކޮށްފައެވެ. އެހެންނަމަވެސް ރަތްމަންދޫ މީހުން ބަދަލު ކުރާނެ ވަކި ރަށެއް ސަރުކާރުން އަދި ކަނޑައަޅައި އާއްމުކޮށްފައެއް ނުވެއެވެ.
ރަތްމަންދޫ މީހުންނަށް މުލިން ގޯތިދޭން ނިންމިކަން މުލީ ކައުންސިލުންވަނީ ރަސްމީކޮށް ރަތްމަންދޫ ކައުންސިލަށް މިހާރު އަންގާފައެވެ. މުލީ ކައުންސިލުން ރަތްމަންދޫ މީހުންނަށް ގޯތި ދޭން ނިންމީ މިދިޔަ ހަފްތާތެރޭގައެވެ.
މުލީ ކައުންސިލްގެ ރައީސް ޝަމްއޫނު ރަމީޒު ވިދާޅުވި ގޮތުގައި މުލީ ރައްޔިތުން މިހާރުވެސް ތިބީ ރަތްމަންދޫ ރައްޔިތުންނަށް ހޫނު މަރުހަބާއެއް ކިޔުމަށް ތައްޔާރަށެވެ.
ޝަމްއޫން ވިދާޅުވި ގޮތުގައި ރަތްމަންދޫ މީހުންގެ ތެރެއިން މުއްޔަށް ބަދަލުވާން އެދޭ މީހުންނަށް މުލީގައި ދިރިއުޅެން ފެށުމަށް މުލިން ގޯތި ދިނުމުގެ އިތުރުން، ގޯތީގައި ގެދޮރު އިމާރާތް ކުރުމަށް ދެ ރަށުގެ ކައުންސިލާއި ސަރުކާރުގެ ކަމާބެހޭ ފަރާތްތަކާއެކު މަޝްވަރާކޮށް ކުރިއަށް ދިޔުމުގައި އެހީތެރިވެދިނުމަށްވެސް ކައުންސިލުން އޮތީ ތައްޔާރަށެވެ.
ރަތްމަންދޫއަކީ މިހާރުވެސް މުއްޔާއި އެއް އިދާރީ ދާއިރާއެއްގައި ހިމެނޭ ރަށެކެވެ. ރަތްމަންދޫގެ އާބާދީއަކީ ގާތްގަނޑަކަށް 240 އެވެ.
