ސުޕްރީމް ކޯޓަށް ދެ ފަނޑިޔާރުން މި އައްޔަންކުރަނީ އެކޯޓްގެ ފަނޑިޔާރުންގެ ގޮތުގައި ތިއްބެވި ޑރ. އަޒްމިރަލްދާ ޒާހިރު އާއި މަހާޒް އަލީ ޒާހިރު މިދިޔަ މަހު ރައްޔިތުން މަޖިލީހުން ވަކިކުރުމަށް ފަހުއެވެ.
ސުޕްރީމް ކޯޓުގައި ހުސްވެފައިވާ ދެ ފަނޑިޔާރުންގެ މަގާމަށް އައްޔަންކުރަން ނަން ފޮނުއްވި ދެބޭފުޅުންގެ ތެރެއިން މުހައްމަދު ސަލީމއަކީ ހައިކޯޓުގެ ފަނޑިޔާރަކެވެ. އަބްދުﷲ ހަމީދަކީ ހައި ކޯޓުގެ ކުރީގެ ފަނޑިޔާރެކެވެ. މި ދެބޭފުޅުންގެ ނަން ދިރާސާކުރުމަށް މަޖިލީހުގެ ރިޔާސަތުން ވަނީ ޖުޑިޝަރީ ކޮމެޓީއަށް ފޮނުވާފައެވެ.
ސުޕްރީމް ކޯޓު ބެންޗުން ހުސްވި ދެ މަގާމަށް ކުރިމަތިލާން ހުޅުވާލުމުން މުއްދަތު ހަމަވިއިރު 12 ބޭފުޅަކު ކުރިމަތިލެއްވިއެވެ. އޭގެ ތެރޭގައި ކުރީގެ ފަނޑިޔާރުންވެސް ހިމެނިވަޑައިގެންނެވިއެވެ.
ފަނޑިޔާރުންގެ ގާނޫނުގައިވާ ގޮތުން، ޖޭއެސްސީން ފޮނުވާ ނަންތަކުގެ ތެރެއިން ރައީސަށް ފެނިވަޑައިގަންނަވާ ނަމެއް ނުވަތަ ނަންތަކެއް ރައްޔިތުންގެ މަޖިލީހަށް ފޮނުވަންޖެހެއެވެ. ރައްޔިތުންގެ މަޖިލީހުން ފާސްކުރުމުން، ހަތް ދުވަހުގެ ތެރޭގައި އެ ބޭފުޅަކު ސުޕްރީމް ކޯޓުގެ ފަނޑިޔާރުކަމަށް ރައީސް އައްޔަންކުރައްވަންޖެހެއެވެ. އަޒްމިރާލްދާ އާއި މަހާޒު ވަކިކުރުމުގެ ކުރިން، އެ ކޯޓުގެ ކުރީގެ ފަނޑިޔާރު ހުސްނުއްސުއޫދު ވަނީ މިދިޔަ ފެބްރުއަރީ މަހު ޖޭއެސްސީން ސަސްޕެންޑް ކުރުމާ ގުޅިގެން އިސްތިއުފާ ދެއްވާފައެވެ.
