މަޖިލީހަށް މިހާރު ހުށަހަޅާފައިވާ މަދަނީ އުދުހުންތަކުގެ ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން އިބްރާހިމް ވިދާޅުވީ ރައީސް ނާސިރުގެ ވެރިކަމުން ފެށިގެން ރައީސް މައުމޫންގެ ވެރިކަން ނިމެންދެން ހުކުރު ދުވަހު ހުކުރު ވަގުތު ރާއްޖެއަށް ފްލައިޓް ޖެއްސުން މަނާކަމަށެވެ. އެ ނިންމުން ބަދަލުކުރީ ރައީސް ނަޝީދުގެ ވެރިކަމުގައިކަމަށް މެމްބަރު އިބްރާހިމް މުހައްމަދު ވިދާޅުވިއެވެ.
މި ނިންމުމުގެ ސަބަބުން އެއާޕޯޓްގެ 31 ޑިޕާޓްމަންޓަކުން 2780 މުވައްޒަފުންގެ ހުކުރު ގެއްލިފައިވާކަމަށާއި އެކަން އެގޮތަށް މިހާރުވެސް ހިނގަމުން އަންނަކަމަށް މެމްބަރު ވިދާޅުވިއެވެ. އެހެންކަމުން މަދަނީ އުދުހުންތަކުގެ ގާނޫނަށް އިސްލާހެެއް ހުށައަޅުއްވަން ބޭނުންކަމަށް ވިދާޅުވެ މެމްބަރު، އިބްރާހިމް މުހައްމަދު ވިދާޅުވީ ހުކުރު ވަގުތު ފްލައިޓް ޖެއްސުން މަނާކުރަން ޖެހޭކަމަށެވެ.
މެމްބަރުން އިބްރާޙިމް މިހެން ވިދާޅުވި ނަމަވެސް މައުމޫނުގެ ވެރިކަމުގައިވެސް ހުކުރު ދުވަހުގެ ހުކުރު ވަގުތު ރާއްޖެއަށް މަތިންދާބޯޓު ޖައްސާފައިވެއެވެ.
