މިމަހުގެ އެއްވަނަ ދުވަހުން ފެށިގެން ކަރަންޓުގެ އަގު ހެޔޮކުރަން ސަރުކާރުން ވަނީ ނިންމާފައެވެ. އެއާއި އެކު ސްޓެލެކޯއިން ވަނީ މިދިޔަ މަހުގެ ބިލްތައްވެސް ތައްޔާރުކުރީ ހެޔޮކުރަން ނިންމި އަގަށް ކަން އިއުލާންކޮށްފައެވެ.
ކަރަންޓް ބިލް ބޮޑުވުން ބައެެއް މީހުން ކޮށްފައިވާ ޝަކުވާތައް
އެހެންނަމަވެސް މިމަހު ކަރަންޓް ބިލްތައް ލިބުނު އިރު އޭޕްރިލްމަހުގެ ބިލަށް ވުރެ ބޮޑުވުމުން ގިނަ ބަޔަކު އަންނަނީ އެކަމުގެ ޝަކުވާތައް ކުރަމުންނެވެ.
އެކަމާއި ގުޅިގެން ސްޓެލްކޯއިން ބުނީ އަގުހެޔޮ ކުރެވުނު ޓެރިފް ރޭޓުން 2025 މެއި މަހުގެ ބިލް ހެދުމުންވެސް ބައެއް ކަސްޓަމަރުންނަށް އޭޕްރީލް މަހުގެ ބިލަށްވުރެ މެއި މަހުގެ ބިލް ބޮޑުވެފައިވާ ކަމަށް ފެންނަނީ ވޭތުވެދިޔަ އޭޕްރީލް މަހު ޑިސްކައުންޓް ލިބިފައިވާތީކަމަށެވެ. އަދި އައު ޓެރިފުން ބިލް ހެދުމުން ބިލް ކުޑަކަމަށް ފެންނާނީ ރޯދައި ކުރީގެ ބިލްތަކާއި އަޅާ ކިޔުމުންކަމަށެވެ.
ކަރަންޓްގެ އަގަށް ގެންނަން ނިންމި ބަދަލުގައިވާ ގޮތުން 0 އިން ފެށިގެން 100 ބޭންޑަށް ނެގުމަށް ނިންމާފައިވަނީ ޔުނިޓަކަށް 1.25 ލާރިއެވެ. މިހާރު މި ބޭންޑަށް ނަގަމުން އަންނަނީ 1.50 ލާރިއެވެ.
