މޭ މަހުގެ 29 ވަނަ ދުވަހާ ހަމައަށް ލިބުނު އާމްދަނީއާއި ކުރެވުނު ހަރަދަށް ބަލާއިރު، ޕްރައިމަރީ ބެލެންސް 3.2 ބިލިއަން ރުފިޔާ ސާޕްލަސްވެފައިވާއިރު، އޮވަރޯލް ބެލެންސް ހުރީ 1.2 ބިލިއަން ރުފިޔާގައެވެ.
ސަރުކާރުން މިހާތަނަށް އެންމެ ބޮޑު ހަރަދެއް ކޮށްފައިވަނީ ލޯނުތައް ދެއްކުމަށާއި މުވައްޒަފުންގެ މުސާރައަށާއި އެލަވަންސްތަކަށެވެ. ރިކަރަންޓް ހަރަދުތަކުގެ ޖުމްލަ 13.8 ބިލިއަން ރުފިޔާގައި ހުރިއިރު، ކެޕިޓަލް ހަރަދުތައް ހުރީ އެންމެ 1.4 ބިލިއަން ރުފިޔާގައެވެ. ކެޕިޓަލް ހަރަދުތަކަށް ހޭދަކުރި ފައިސާގެ ތެރެއިން 1.2 ބިލިއަން ރުފިޔާ ހަރަދުކޮށްފައިވަނީ އުމްރާނީ ތަރައްގީއަށެވެ.
ފިނޭންސް މިނިސްޓްރީގެ ވީކްލީ ފިސްކަލް ޑިވެލޮޕްމަންޓް ރިޕޯޓުން ދައްކާގޮތުގައި މިއަހަރު ލިބުނު 16.5 ބިލިއަން ރުފިޔާގެ އާމްދަނީއަކީ ކުރީ އަހަރަށްވުރެ 1.1 ބިލިއަން ރުފިޔާ އިތުރު އަދަދެކެވެ. މީގެ ތެރޭގައި ޓެކްސްގެ ގޮތުގައި 12.9 ބިލިއަން ރުފިޔާ އަދި ޓެކްސް ނޫން އާމްދަނީގެ ގޮތުގައި 3.4 ބިލިއަން ރުފިޔާ ހިމެނެއެވެ. މި އާމްދަނީގެ ބޮޑު އިންސައްތައެއް ލިބިފައިވަނީ ޓޫރިޒަމް ދާއިރާއިން ދައްކާފައިވާ ޓީޖީއެސްޓީ އާއި އެހެނިހެން ޓެކްސްތަކުންނެވެ. އަދި ސަބްސިޑީ ދިނުމަށް ކުރި ހަރަދު ކުރީ އަހަރަށްވުރެ 400 މިލިއަން ރުފިޔާ މަދެވެ.
