މި މައްސަލަ ވޯޓުގައި ބައިވެރިވި 63 މެންބަރުންގެ އިއްތިފާގުން ފާސްކުރިއެވެ.
މަޖިލީހުގެ ގަލޮޅު އުތުރު ދާއިރާގެ އެމްޑީޕީ މެންބަރު ކުޑޫ ރައްޔިތުންގެ މަޖިލީހުގެ ލެޓާހެޑުގައި ސިޓީއެއް ހެލްތު މިނިސްޓަރު އަބްދުﷲ ނާޒިމްއަށް ފޮނުވީ އެޕްރީލް 19 ގައެވެ. ސިޓީގައި އެ މަރުކަޒުގެ ހާލަތު ދެނެގަނެ ރިޕޯޓެއް ތައްޔާރު ކުރުމުގެ ބޭނުމަށް ޒިޔާރަތް ކުރުމުގެ ފުރުސަތު ހޯދުމަށް އެދިފައިވާއިރު ގާތްގަނޑަކަށް ދެ މަސްދުވަސް ފާއިތުވެގެންދިޔައިރު ވެސް ހެލްތު މިނިސްޓްރީގެ ފަރާތުން ޖަވާބު ދީފައި ނުވެއެވެ.
މި މައްސަލަ އިމްތިޔާޒްގެ މައްސަލައެއްގެ ގޮތުގައި މެންބަރު ކުޑޫ މަޖިލީހަށް ހުށަހެޅުއްވީ ސިޓީއަށް ޖަވާބެއް ނުދިނުމަކީ ރައްޔިތުންގެ މަޖިލިސްގެ އިމްތިޔާޒުތަކާއި ބާރުތަކުގެ ގާނޫނަށް ތަބާނުވުން ކަމަށް ސިފަކުރައްވައެވެ. ރައްޔިތުންގެ މަޖިލީހުގެ މެންބަރުންނަށް ދައުލަތުގެ ހުރިހާ އޮފީހަކުން އެއްބާރުލުން ދިނުމަކީ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނުގެ ދަށުން ލާޒިމު ކަމެކެވެ. މި މައްސަލަ މަޖިލީހަށް ބަލައިގަނެ ކޮމިޓީއަށް ފޮނުވަން ފާސްކުރީ ސަރުކާރު ހިންގާ ޕީއެންސީ އާއި އެމްޑީޕީ މެންބަރުންގެ ތާއީދާއެކުއެވެ.
