ސްޓޭޓް މިނިސްޓަރު މިހެން ވިދާޅުވީ އަލަށް އެކުލަވާލާ ޑިޖިޓަލް އައިޑެންޓިޓީ ބިލަށް ހިޔާލު ހޯދުމަށް ބޭއްވި ވޯކްޝޮޕް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ޑިޖިޓަލް އައިޑެންޓިޓީ ނިޒާމު އިތުރަށް ހަރުދަނާކުރުމަށް ސަރުކާރުން ގިނަ މަސައްކަތްތަކެއް ކުރަމުންދާކަމަށް ކިނާނަތު ވިދާޅުވިއެވެ. އަދި އެޕްލިކޭޝަން ބޭނުންކުރާ ފަރާތްތަކުގެ މައުލޫމާތުގެ ސަލާމަތް ކަށަވަރުކުރުމަށް ޑިޖިޓަލް އައިޑެންޓިޓީއާ ބެހޭ ބިލެއްގެ މަސައްކަތް ފަށާފައިވާކަމަށް ސްޓޭޓް މިނިސްޓަރު ބުންޏެވެ.
ރާއްޖޭގެ ޑިޖިޓަލް ޓްރާންސްފޮމޭޝަން ސިޔާސަތުގެ ދަށުން މުހިންމު ބިލުތަކެއް އެކުލަވާލުމުގެ މަސައްކަތް މިހާރު ކުރަމުންދާކަމަށް ކިނާނަތު ވިދާޅުވިއެވެ. މީގެ ތެރޭގައި ޑޭޓާ ސެކިޔުރިޓީއާ ބެހޭ ބިލާއި ސައިބާ ސެކިއުރިޓީ ބިލު މިހާރު ބަނޑާރަނައިބުގެ އޮފީހަށް ފޮނުވާފައިވާކަމަށާއި، "މޯލްޑިވްސް 2.0" ބިލާއި އާޓިފިޝަލް އިންޓެލިޖެންސްގެ ބިލުގެ ޑްރާފްޓް އެކުލަވާލުމުގެ މަސައްކަތްވެސް ކުރަމުންދާކަމަށް ކިނާނަތު ވިދާޅުވިއެވެ. ޑިޖިޓަލް އައިޑެންޓިޓީ ބިލަށް ހިޔާލު ހޯދުމަށް ބޭއްވި ވޯކްޝޮޕްގައި ކަމާ ބެހޭ އިދާރާތަކުގެ 90 އަށްވުރެ ގިނަ މީހުން ބައިވެރިވިއެވެ.
