ދައުލަތުގެ މީޑިއާ މެދުވެރިކުރައްވައި މިކަން ހާމަކުރައްވަމުން ޓްރާންސްޕޯޓް މިނިސްޓަރު ވިދާޅުވީ ރާއްޖޭގެ އޭވިއޭޝަން ދާއިރާގެ ކުރިއެރުން 7 ޕަސަންޓުގައި ހުރި އިރު، ފާއިތުވި ފަސް އަހަރުގެ ތެރޭގައި އެވްރެޖްކޮށް އަހަރަކު 20 އިން 25 އަށް ވުރެ ގިނަ ކެޑޭޓް ޕައިލެޓުންނަށް ވަޒީފާގެ ފުރުސަތު ހުޅުވިފައިވަނީ ހަމައެކަނި މޯލްޑިވިއަން އަދި ޓީއެމްއޭ ފަދަ މަދު އެއަރލައިންތަކަކުންނެވެ.
ޕައިލެޓުކަން ކިޔަވައިގެން އަންނަ ދަރިވަރުންނަށް ވަޒީފާ ނުލިބުމުގެ މައްސަލައަކީ ކަންބޮޑުވުން ބޮޑު މައްސަލައެއް ކަމަށާއި ރައީސް މުއިއްޒުގެ ސަރުކާރުން އެ މައްސަލަ ހައްލުކުރުމަށް މަސައްކަތްކުރަމުންދާ ކަމަށްވެސް މިނިސްޓަރު ވިދާޅުވިއެވެ. ކެޑޭޓް ޕައިލެޓުންގެ ވަޒީފާގެ މައްސަލަ ހައްލުކުރުމަށްޓަކައި، މިހާރު އޮތް މިންގަނޑަށްވުރެ އިތުރަށް ކުދިން ނެގުމަށް އޮޕަރޭޓަރުންނަށް އަންގާފައިވާ ކަމަށް އަމީން ވިދާޅުވިއެވެ.
