ކަނޑިތީމު ދާއިރާގެ މެންބަރު އަމީން ފައިސަލް ހުށަހެޅުއްވި ގަރާރު ބަލައިގަތުމާ މެދު މިއަދު ނެގި ވޯޓުގައި އެ ގަރާރު ބަލައިގަންނަން 47 މެންބަރަކު ވޯޓު ދެއްވި އެވެ. އެހެންވެ ގަރާރު ދިރާސާކުރަން ތަރިކައާ ބެހޭ ކޮމިޓީ އަދި އިޖުތިމާއީ ކޮމިޓީއަށް ވަނީ ފޮނުވައިފަ އެވެ.
ގަރާރުގައި ބުނެފައިވަނީ ސިއްހީ އަދި ތައުލީމީ ދާއިރާގެ މަސައްކަތްތެރިން އިތުރު އުޖޫރައެއް ނުލިބޭ ގޮތަށް ގިނަ ވަގުތުތަކެއް މަސައްކަތުގައި ހޭދަކުރާ ކަމަށެވެ.
އެ ގަރާރުގެ މައިގަނޑު ބޭނުމަކީ:
އިތުރު ގަޑީގެ ފައިސާ ނުލިބޭ ގޮތަށް ގިނަ ވަގުތުތަކެއް މަސައްކަތްތަކުގައި ހޭދަކުރަމުން ދިޔުމުގެ ސަބަބުން ދިމާވާ ގޮންޖެހުންތައް ހައްލުކުރުން
އިތުރު ގަޑީގެ ފައިސާ ދިނުމާ ގުޅޭ އުސޫލުތައް މުރާޖައާކުރުމަށް ކަމާ ބެހޭ އިދާރާތަކަށް އެންގުމާ މެދު މެންބަރުން ދެކޭ ގޮތް ދެނެގަތުން
ގަރާރުގައި ބުނީ އިތުރު ގަޑީގެ ސީލިންއަށް ވުރެ އިތުރަށް މަސައްކަތް ކުރުވަން ޖެހޭ ނަމަ، އިތުރު ގަޑީގެ ފައިސާ ލިބިދެވޭނެ އިސްތިސްނާ އުސޫލެއް އޮތުން މުހިއްމު ކަމަށެވެ. އަދި އިތުރު ގަޑީގެ ފައިސާ ދޭ އުސޫލުތައް ވެސް މުރާޖައާ ކުރަން ޖެހޭ ކަމަށް ގަރާރުގައި ބުންޏެވެ.
މި ގަރާރަށް ބަހުސް ކުރައްވަމުން ކެންދޫ ދާއިރާގެ މަޖިލިސް މެންބަރު، މައުރޫފް ޒާކިރު މިއަދު ވިދާޅުވީ ތައުލީމީ ދާއިރާގައި މަސައްކަތް ކުރާ ފަރާތްތަކަށް އިތުރު ގަޑީގެ ފައިސާ ނުދިނުމަކީ ގާނުނީ ކުށެއް ކަމަށާއި ސިވިލް ސާވިސްގެ އެހެން މުވައްޒަފުންނަށް އިތުރު ގަޑީގެ ފައިސާ ލިބޭ އުސޫލުން، ހޮނިހިރު ދުވަހު މަސައްކަތް ކުރާނަމަ، ޓީޗަރުންނަށް ވެސް އިތުރު ގަޑީގެ ފައިސާ ލިބެން ޖެހޭނެ ކަމަށެވެ.
އޭނާ ވިދާޅުވީ ހޮނިހިރު ދުވަހު ޓީޗަރުން މަސައްކަތަށް ނެރޭނަމަ އެ ދުވަހަށް ކަނޑައެޅިފައިވާ އިތުރު ގަޑީގެ ފައިސާ ދޭންޖެހޭނެ ކަމަށެވެ. އަދި ޓީޗަރުންގެ މަސައްކަތުގެ މާހައުލުގެ ރައްކާތެރިކަން ކަށަވަރު ކުރުމަށް ކޮންމެ ޓީޗަރަކަށް ގޮނޑި އާއި މޭޒު ފޯރުކޮށްދޭން ޖެހޭނެ ކަމަށް މައުރޫފް ވިދާޅުވި އެވެ.
ވައިކަރަދޫ ދާއިރާގެ މެމްބަރު ހުސައިން ޒިޔާދު ވެސް ވަނީ، ތައުލީމީ ދާއިރާގައި މުވައްޒަފުން މަދުވުމުގެ ކަންބޮޑުވުން ފާހަގަކުރައްވައިފައެވެ. އަދި ދިއްދޫ ދާއިރާގެ މެމްބަރު އަބްދުއްލަތީފް ދެއްވި ޔަގީންކަމާއެކު މި މައްސަލަ ހައްލުވާނެކަމަށް އުންމީދު ކުރައްވައި ކަމަށް އޭނާ ވިދާޅުވި އެވެ.
