ސިންގަޕޫރުގައި ބޭއްވުނު އިންވެސްޓްމަންޓު ފޯރަމްގައި ރާއްޖޭގެ ފަރާތުން މި އެއްބަސްވުމުގައި ސޮއިކުރެއްވީ އިކޮނޮމިކް މިނިސްޓަރު މުހައްމަދު ސައީދެވެ.
މި ޕްރޮގްރާމަކީ މުއްސަދި މީހުން ރާއްޖޭގައި އިންވެސްޓް ކުރުމަށް ގެނައުމަށް ފަރުމާކުރެވޭ ޕްރޮގްރާމެއްކަމަށް ސަރުކާރުން ބުންޏެވެ. މިހާރު ވެސް ކޯޕަރޭޓް ރެޒިޑެންސީ ވިސާ ދެމުން އަންނަ ނިޒާމު އިތުރަށް ފުޅާކޮށް އިންވެސްޓާ ރެޒިޑެންސީ ވިސާ ޕްރޮގްރާމެއްގެ ގޮތުގައި ފެށުމަށް މި ސަރުކާރުން ނިންމީ މިދިޔަ އަހަރުގެ ސެޕްޓެމްބަރު މަހުއެވެ.
ލަންޑަނުގައި ބޭސްވެފައިވާ ހެންލީ އެންޑް ޕާޓްނާސްއަކީ އިންވެސްޓްމަންޓު މައިގްރޭޝަނަށް ހާއްސަ ކޮންސަލްޓަންސީ ފާމެކެވެ. މި ކުންފުނިން މީގެ ކުރިން ސެއިންޓް ކިޓްސް، މޯލްޓާ، ސައިޕްރަސް އަދި ތައިލޭންޑް ފަދަ ގައުމުތަކާ ގުޅިގެން މިފަދަ ޕްރޮގްރާމްތައް ހިންގައި، 15 ބިލިއަން ޑޮލަރުގެ ފޮރިން އިންވެސްޓްމަންޓު ހޯދައިދީފައިވެއެވެ. ނަމަވެސް، މި އައު ޕްރޮގްރާމްގެ ދަށުން ވިސާ ދިނުމަށް ކަނޑައަޅާނެ އެންމެ މަދު އަދަދެއް އަދި ހާމަކޮށްފައެއް ނުވެއެވެ.
