މި ބައްދަލުވުމަކީ އެންޓި ކޮރަޕްޝަން ކޮމިޝަންގެ މަސައްކަތްތައް ނިންމުމަށް ހުރި ދަތިތަކާ ގުޅޭ ގޮތުން މަޖިލީހާ މައުލޫމާތު ހިއްސާ ކުރުމަށް އެ ކޮމިޝަނުން އަމިއްލައަށް އެދިގެން ތާވަލު ކުރި ބައްދަލުވުމެކެވެ.
ބައްދަލުވުން ސިއްރު ކުރަން ހުށަހެޅުއްވީ ކެލާ ދާއިރާގެ ޕީއެންސީ މެންބަރު، އަބްދުﷲ ޝަރީފެވެ. އަދި އެ ހުށަހެޅުއްވުމަށް ތާއީދު ކުރެއްވީ ހެންވޭރު އުތުރު ދާއިރާގެ ޕީއެންސީ މެންބަރު، އަހުމަދު އައިފާނެވެ. މި ހުށަހެޅުން ފާސްކުރީ ކޮމިޓީގައި ބައިވެރިވި މެންބަރުންގެ އިއްތިފާގުންނެވެ. ނަމަވެސް މި ބައްދަލުވުން ސިއްރު ކުރަން ފާސްކުރީ ކޮން ސަބަބަކާ ގުޅިގެން ކަމެއް ކޮމިޓީގެ މެންބަރުން ހާމައެއް ނުކުރެއެވެ.
މި ބައްދަލުވުން ސިއްރު ކުރިއިރު، ސުޕްރީމް ކޯޓުގެ ކުރީގެ ފަނޑިޔާރުން، އަޒްމިރާލްދާ ޒާހިރު އާއި މަހާޒް އަލީ ޒާހިރު އަދި ހުސްނުއްސުއޫދުގެ މައްސަލަ އޭސީސީން ދަނީ ތަހުގީގު ކުރަމުންނެވެ. މިއީ ޖިނާއީ ތަހުގީގެއްކަމަށް ބެލެވޭއިރު، މިކަމާ ގުޅިގެން މިހާތަނަށް އެ ކޮމިޝަނުން އެއްވެސް ތަފްސީލެއް އާރްޓީއައި ހުށަހަޅައިގެން ވެސް ހާމައެއް ނުކުރެއެވެ.
