ބޭސްފަރުވާގެ ހަރަދު ކުރުމަށް ދަތިވާ ފަރާތްތަކަށް އެހީތެރިވުމަށް ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) މެދުވެރިކޮށް ޖޫން މަހު ޖުމުލަ 25،811،205 ރުފިޔާ ހަރަދުކުރިއެވެ.
ޖޫން މަހުގެ ތަފާސްހިސާބުތަކުން ދައްކާގޮތުން، އެންމެ ގިނައިން ހަރަދުކޮށްފައިވަނީ ނޭވާލާ ނިޒާމުގެ ބަލިތަކަށެވެ. މީގެ އިތުރުން މައިބަދައާއި ނާރުގެ ބަލިތައް، ކަށީގެ ބަލިތައް، ވިހެއުމާ ގުޅޭ ކަންކަން އަދި ކެންސަރު ބައްޔަށްވެސް ފައިސާ ހަރަދުކުރެވުނެވެ. އަދި ތަފާސްހިސާބުތަކުން ދައްކާގޮތުން، އެންމެ މަދުން ހަރަދުވެފައިވަނީ ތެލަސީމިއާ ބައްޔަށެވެ.
ރާއްޖޭގެ ޕްރައިވެޓް ހޮސްޕިޓަލްތަކުން އެނދުމަތިކޮށްގެން ހޯދާފައިވާ ފަރުވާތަކަށް ބޭސްފަރުވާގެ އެހީގެ ޕްރޮގްރާމް މެދުވެރިކޮށް ޖުމުލަ 6 މިލިއަނަށްވުރެ ގިނަ ރުފިޔާ ހަރަދުކޮށްފައިވެއެވެ.
މީގެ ތެރޭގައި އޭޑީކޭ ހޮސްޕިޓަލާއި ޓްރީޓޮޕް ހޮސްޕިޓަލް މެދުވެރިކޮށް ކޮންމެ ތަނަކަށް 3 މިލިއަން ރުފިޔާ ހަރަދުވެފައިވެއެވެ. އަދި ޕްރައިވެޓް ހޮސްޕިޓަލްތަކުން އެންމެ ގިނައިން ފަރުވާ ހޯދާފައިވަނީ ކަށީގެ ބަލިތަކަށެވެ.
ހަމައެއާއެކު، ބޭސްފަރުވާ ކުރިއަށް ގެންދިއުމަށް ބޭނުންވާ އާލާތްތަކާއި މެޝިންތައް ހޯދުމަށް މާލީ އެހީގެ ގޮތުގައި 2.3 މިލިއަން ރުފިޔާ ހަރަދުކޮށްފައިވާކަން އެންސްޕާއިން ހާމަކުރިއެވެ.
