މި އަހަރުގެ ޖޫން 12 ވަނަ ދުވަހު އަހުމަދާބާދުން ލަންޑަނަށް ފުރި އެ ފްލައިޓުގައި ތިބި 260 މީހުން މަރުވި އެވެ. އެއަކްރާފްޓް އެކްސިޑެންޓް އިންވެސްޓިގޭޝަން ބިއުރޯ (އޭއޭއައިބީ) އިން ނެރުނު ފުރަތަމަ ރިޕޯޓުގައި ވަނީ ފްލައިޓް 787-8 ޑްރީމްލައިނާގެ ފިއުލް ސްވިޗްތައް ޕައިލެޓުން "ކަޓްއޮފް" ކުރިކަމަށް ފާހަގަކޮށްފައެވެ.
އައިސީޕީއޭ އިން ބުނީ ހާދިސާއާ ގުޅިގެން މީޑިއާއިން ޝާއިއުކުރާ ހަބަރުތައް، ހާއްސަކޮށް ޕައިލެޓުން ގަސްދުގައި މަރުވާން އުޅުނު ކަމަށް ބުނާ ހަބަރުތަކަކީ "އަހުލާގީ ގޮތުން އެކަށީގެންނުވާ" ގޮތަކަށް ލިޔާ ހަބަރުތަކެއްކަމަށް ބުނެފައެވެ.
އެއާ އިންޑިއާ ބޯޓު ވެއްޓުނު ސަރަހައްދުން ދުން އަރަނީ. ފޮޓޯ: އިންޑިއާ ޓުޑޭ
އިންޑިއާގެ ޕައިލެޓުންގެ ޖަމްއިއްޔާތައް ވަނީ ތަހުގީގުގައި ބައިވެރިވެ، އެއާކްރާފްޓްގެ މެކޭނިކަލް ނުވަތަ ސިސްޓަމް ފެއިލިއާއަކަށް އިތުރަށް ތަހުގީގުކުރުމުގެ މުހިންމުކަން ފާހަގަކޮށްފައެވެ. އަދި އޭއެލްޕީއޭ އިންޑިއާ އިން ވަނީ ތަހުގީގުގައި ޕައިލެޓުންގެ ފަރާތުން ބައިވެރިވުމަށް ގާނޫނީ ފިޔަވަޅުތަކެއް އަޅަން ނިންމާފައެވެ. މި މައްސަލައާ ގުޅިގެން އިންޑިއާގެ ސިވިލް އޭވިއޭޝަން މިނިސްޓަރު ކިންޖަރަޕު ރާމް މޯހަން ނައިޑޫ ވިދާޅުވީ ފުރިހަމަ ތަހުގީގު ނިމެންދެން ވަކި ނިންމުމަކަށް ނާންނާނެ ކަމަށެވެ.
