މިކަމާ ބެހޭގޮތުން މަޝްވަރާކުރުމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާ ބެހޭ ވުޒާރާއާއި، އެމްކިއުއޭއިން ގުޅިގެން ބައްދަލުވުމެއް ބާއްވާފައިވެއެވެ.
ބައްދަލުވުމުގައި ވާހަކަދައްކަވަމުން އެމްކިއުއޭގެ ސީއީއޯ ފިޒާނާ ވިދާޅުވީ ހެދިފައިވާ ގަވާއިދުތައް ރަނގަޅަށް ތަންފީޒު ނުކުރެވުމުގެ ސަބަބުން މަތީ ތައުލީމީ ނިޒާމަށް އެދެވޭ ބަދަލެއް އައިސްފައި ނުވާކަމަށެވެ. އަދި މިހާރު މުޖުތަމައުގައި ދެކެވޭ ވާހަކަތަކުގެ ތެރޭގައި ކިޔަވައިގެން ނިކުންނަ ކުދިންގެ ފެންވަރު ދަށްކަމަށާއި، ސަނަދު ހޯދަނީ މީހަކު ލައްވާ އަގު ދީގެން ކަމަށާއި، އެއްފަހަރާ ދެ ވަޒީފާއަކަށް ދަމުން ދަރިވަރުން ޑިގްރީ ހަދާކަމަށް ބުނާ އަޑުތައް އިވޭކަމަށް ވިދާޅުވިއެވެ.
ފިޒާނާ އިތުރަށް ފާހަގަކުރެއްވީ ކޯސްތައް ޕާޓް-ޓައިމްކޮށް ހިންގާކަމަށް ބުނި ނަމަވެސް މީގެ މާނަ އޮޅިފައިވާކަމަށެވެ. ޕާޓް-ޓައިމްގެ ނަމުގައި ކިޔަވަމުންދާއިރު ފުލް-ޓައިމް ކޯހެއްގެ މަސައްކަތުގެ ބުރަދަން އުފުލަމުންދާ ދަރިވަރުންގެ އަދަދު އިތުރުވަމުންދާކަމަށާއި މީގެ ސަބަބުން ފޯރުކޮށްދެވޭ ތައުލީމުގެ ފެންވަރަށް އަސަރުކުރާކަމަށެވެ. މި މަޝްވަރާ ބައްދަލުވުމުގައި 80 އަށްވުރެ ގިނަ ބައިވެރިން ބައިވެރިވެފައިވާއިރު، 11 ކޮލެޖަކާއި 2 ޔުނިވަރސިޓީއާއި އަދި އާންމު އަދި ސަރުކާރުގެ 12 އިންސްޓިޓިއުޝަން ހިމެނެއެވެ.
