އިންޑިއާގެ ޕްރައިމް މިނިސްޓަރު ނަރެންދުރަ މޯދީ ވަޑައިގަތުމާއެކު އިސްލާމީ މަރުކަޒު "ބަންދުކުރި" ކަމަށް ސޯޝަލް މީޑިއާގައި ފެތުރުނު ހަބަރާ ގުޅިގެން، އިސްލާމީ މަރުކަޒުގެ އިމާމް އައްސައިހު އިބުރާހިމް ރަޝީދު ހަސަން ކަން ހިނގާފައިވާ ގޮތް ސާފުކޮށްދެއްވައިފިއެވެ.
Advertisement
އިމާމު ވިދާޅުވީ އެއްވެސް ހާލެއްގައި މިސްކިތް ނަމާދު ނުކުރެވޭ ގޮތަށް ހުކުރު ދުވަހު ބަންދުކޮށްފައި ނުވާ ކަމަށެވެ.
ބައެއް މީޑިއާތަކުން ފޮޓޯއާއެކު ހަބަރު ފަތުރަމުން ބުނެފައިވާ ގޮތާ ހިލާފަށް، އިސްލާމީ މަރުކަޒު އެއްވެސް ވަގުތެއްގައި ނަމާދު ނުކުރެވޭ ގޮތަށް ބަންދުކޮށްފައި ނުވާކަން އިމާމް އައްސައިހު އިބުރާހިމް ރަޝީދު ހަސަން ވިދާޅުވިއެވެ.
އިންޑިއާގެ ޕުރައިމް މިނިސްޓަރު ނަރެންދުރަ މޯދީ ރާއްޖެއަށް ކުރެއްވި ދަތުރުފުޅުގައި، ޖުމުހޫރީ މައިދާނާއި އިންވެގެންވާ ސަރަހައްދުތައް ބަންދުކޮށްފައިވާތީ، އިސްލާމީ މަރުކަޒު ސަރަހައްދުގައި ވެހިކަލް ދުއްވުމާއި ޕާކުކުރުން ވަކި ވަގުތަކަށް މަނާކޮށްފައިވެއެވެ.
"މިކަމުގެ ސަބަބުން، އާންމުކޮށް ނަމާދަށް އަންނަ މީހުންނަށް ދުރު ސަރަހައްދުގައި ވެހިކަލް ޕާކުކުރަން ޖެހުމުން، އަސުރު ނަމާދަށް ހާޒިރުވީ މަދު ބައެއް،" ކަމަށް ވެސް އިމާމު ވިދާޅުވިއެވެ.
އިސްލާމީ މަރުކަޒުގައި އަސުރު ނަމާދަށް ބަންގި ގޮވިއިރު، މިސްކިތުގައި ހުރީ އެންމެ މީހެއް ކަމަށާއި، ނަމާދު ޖަމާއަތުގައި ބައިވެރިވީ 25 އެއްހާ މީހުން ކަމަށް ސައިހު އިބުރާހިމް ވިދާޅުވިއެވެ.
