އިމިގްރޭޝަނުން ހާމަކުރި މައުލޫމާތުގައިވާ ގޮތުން މި އޮޕަރޭޝަން ހިންގީ ހޮނިހިރު ދުވަހުގެ ހަވީރުއެވެ. އަދި މި ކެފޭ ބަލައި ފާސްކުރުމަށްފަހު އެ ދެ ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެސްފައެވެ.
މިދިޔަ މަހުގެ 31 ވަނަ ދުވަހު މާލޭގެ ކަރަންކާ މަގުގައި ހުރި ކެފޭއަކާއި އެކަމޮޑޭޝަން ބްލޮކެއް ރެއިޑްކޮށް، ގަވާއިދާ ހިލާފަށް އުޅެމުންދިޔަ 25 ބިދޭސީން ހައްޔަރުކޮށްފައިވެއެވެ. މީގެ އިތުރުން ދިލްބަހާރުމަގުގައި ހިމެނޭ ބިދޭސީންގެ ނުފޫޒު ބޮޑު ކަމަށް ބެލެވޭ ވިޔަފާރިތައް ހިންގާ ތަންތަން ރެއިޑްކޮށް 31 ބިދޭސީން ހައްޔަރުކޮށްފައިވާއިރު، ހުޅުމާލޭގެ "ރަށު މާރުކޭޓު" ސަރަހައްދުން 37 ބިދޭސީން ވެސް ހައްޔަރުކޮށްފައިވެއެވެ.
ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަށް އަވަސް ހައްލެއް ހޯދުމަށް ސަރުކާރުން ބާރު ސްޕީޑުގައި މަސައްކަތް ކުރަމުން އަންނަ ކަމަށް އިމިގްރޭޝަނުން ބުންޏެވެ. އެގޮތުން ރާއްޖޭގައި ތިބި ހުރިހާ ބިދޭސީންގެ މައުލޫމާތު އެއް ޑޭޓާބޭސްއަކަށް ގެނެސް، ތިން އަހަރުގެ ތެރޭގައި ބިދޭސީންގެ މައްސަލަތަކަށް ޖުމްލަ ހައްލެއް ގެނައުމަކީ ސަރުކާރުގެ އަމާޒެއް ކަމަށްވެސް އިމިގްރޭޝަނުން ބުންޏެވެ.
