މި މައްސަލަ ދިމާވެފައިވަނީ ބޮޓްރައިކޮކޮސް ބްރައުނީ ނަމަކަށް ކިޔާ ގްރީން އެލްގީއެއް ގިނަވުމުގެ ސަބަބުންކަމަށް ބެލެވެއެވެ. ގަދައަށް އަވި ދިއްލުމުން މި އެލްގީއިން ރަތް ކުލައިގެ ޕިގްމެންޓެއް އުފެދޭކަމަށް ވެއެވެ.
މި ކޯރުގެ ފެން ލޭ ކުލައަށް ބަދަލުވެފައިވީނަމަވެސް، ފެން ބޭނުންކުރުމާއި އަދި ފެންގަނޑުގައި ފެތުން ރައްކާތެރިކަމަށް އިޒްރޭލްގެ އޮތޯރިޓީތަކުން ކަށަވަރުކޮށްދީފައިވެއެވެ. އަދި މީގެ ސަބަބުން އެއްވެސް ވިހައެއް ނުވަތަ ސިއްހީ ގެއްލުމެއް ނުވާނެކަމަށް ރަސްމީކޮށް ވަނީ އިއުލާނުކޮށްފައެވެ.
އާންމުންނަށް ހައިރާންކަން ގެނެސްދިން މި ގުދުރަތީ ހާދިސާއަކީ ކޯރުގެ އީކޯ ސިސްޓަމަށް ނުވަތަ އެތަނަށް ޒިޔާރަތްކުރާ މީހުންނަށް ނުރައްކަލެއް ކުރިމަތިކުރުވާނެ ކަމެއް ނޫންކަމަށް އެ ސަރަހައްދުގެ ލޯކަލް އޮތޯރިޓީތަކުން ބުނެފައިވެއެވެ. ނަމަވެސް ހާލަތު ދެމެހެއްޓެނިވި ގޮތެއްގައި ރައްކާތެރިކަން ކަށަވަރުކުރުމަށް މޮނިޓަރކުރަމުންދާކަން އޮފިޝަލުން ހާމަކޮށްފައިވެއެވެ.
