މި ހިދުމަތް އެ ރަށުގައި ރަސްމީކޮށް ފައްޓަވާދެއްވީ ރައީސް ޑރ. މުއިއްޒު މިހާރު ހދ ކުރައްވަމުން ގެންދަވާ ދަތުރުފުޅުގެ ތެރެއިން އެރަށުގައި އެކަމަށް ބޭއްވި ހާއްސަ ރަސްމިއްޔާތެއްގައި އެމަނިކުފާނުއެވެ. ނޮޅިވަރަންފަރުގައި އޭޓީއެމް ހިދުމަތް ފައްޓަވާދެއްވުމަށްފަހު ރައީސް މުއިއްޒު ވަނީ ހަނދާނީ ބޭންކު ކާޑެއް ރަށު ކައުންސިލާ ހަވާލުކުރައްވާފައެވެ.
ނޮޅިވަރަންފަރުގައި ހުޅުވީ ބީއެމްއެލް އިސްލާމިކް ބާރާންޗެކެވެ. މި ބްރާންޗު މެދުވެރިކޮށް ބޭންކިން ހުރިހާ ހިދުމަތެއްވެސް ލިބޭނެކަމަށް ބީއެމްއެލުން ބުނެއެވެ.
ނޮޅިވަރަންފަރުގައި ހުޅުވި ބީއެމްއެލް އިސްލާމިކް ބާރާންޗް
ރާއްޖޭގައި މީހުން ދިރިއުޅޭ ހުރިހާ ރަށެއްގައި އޭޓީއެމްގެ ހިދުމަތް ފެށުމަކީ މި ސަރުކާރުގެ އަމާޒެކެވެ. މި އަހަރު ތެރޭގައި 100 ރަށެއްގައި މުޅިން އަލަށް އޭޓީއެމްގެ ހިދުމަތް ގާއިމުކުރުމުގެ މަސައްކަތް ބީއެމްއެލްއިން އަންނަނީ ކުރަމުންނެވެ.
މިދިޔަ ނޮވެމްބަރު މަހު ފެށި މި މަސައްކަތުގެ ދަށުން މި އަހަރުގެ މިހާތަނަށް 50 ވުރެ ގިނަ ރަށުގައި އަލަށް އޭޓީއެމްގެ ހިދުމަތް ވަނީ ފަށާފައެވެ. މިހާރު ރާއްޖޭގެ އަށް އަތޮޅެއްގެ ހުރިހާ ރަށެއްގައި އެ ހިދުމަތް ގާއިމްކޮށްފައިވާ ކަމަށް ބީއެމްއެލުން ވަނީ ބުނެފައެވެ. އެއީ ހއ، ށ، ނ، ކ، މ، ދ ބ. އަދި އއ އަތޮޅެވެ.
