ރައީސް ޑރ. މުއިއްޒު މިހާރު ހދ އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ވަނީ ހދ. މަކުނުދޫގައި އަޅާ އެއާޕޯޓް އަަޅަން ބޭނުންވާ ބިން ހިއްކުމާއި އެއާޕޯޓެއް ތަރައްގީ ކުރުމުގެ މަސައްކަތް އެމްޓީސީސީއާ ހަވާލުކޮށްފައެެވެ.
މަކުނުދޫގައި އަޅަނީ 1800 މީޓަރުގެ ރަންވޭ އަކާއެކު ތަރައްގީކުރާ އެއާޕޯޓެއްކަމަށެވެ. އެ ރަންވޭއަށް ބޭނުންވާ ބިމާއި އިޖްތިމާއީ ބޭނުންތަކަށް އިތުރު 22 ހެކްޓަރުގެ ބިން ހިއްކަން ވަނީ ނިންމާފައެވެ. އެއާޕޯޓް އެޅުމަށްފަހު އެތަން ހިންގުން ހަވާލުކުރަން ނިންމާފައިވަނީ އެމްއޭސީއެލްއާއެވެ.
މަކުނުދޫ އެއާޕޯޓް އެޅުމާއި ބިން ހިއްކުމުގެ އެއްބަސްވުމުގައި ސޮއިކުރުމުގެ ތެރެއިން
މަކުނުދޫ ރައްޔިތުންނާއި ވާހަކަ ދައްކަވަމުން ރައީސް މުއިއްޒު ވިދާޅުވީ މަކުނުދޫގެ ތަރައްގީއަށް އެންމެ މުހިންމީ އެއާޕޯޓް ކަމަށެވެ. މަކުނުދޫއަކީ އެންމެ އެކަހެރިކޮށް އޮންނަ ރަށްކަމަށްވުމުން އެންމެ އިސްކަމެއް ދެއްވަނީ ވީހާވެސް އަވަހަށް އެއާޕޯޓްގެ މަސައްކަތް ނިންމުމަށްކަމަށްވެސް ރއަީސް މުއިއްޒު ވިދާޅުވިއެވެ.
މަކުނުދޫ ރައްޔިތުންނަށް ބޭނުންވާ ތަރައްގީގެ މަޝްރޫއުތަކުގެ ތަފްސީލުތައް ދެއްވުމަށްފަހު ރައީސް މުއިއްޒު ވިދާޅުވީ ދެން އެމަނިކުފާނު އެރަށް ވަޑައިގަންނަވާނީ އެއަރޕޯޓް މަޝްރޫއު ނިންމާ އެތަން ހުޅުވުމަށާއި އެ ރަށުގައި ކުރިޔަށް ގެންދިޔަ ގިނަ މަޝްރޫއުތަކެއްގެ ނިމުން ފާހަގަކުރުމަށްކަމަށެވެ.
