ކޯޓުތަކުގެ މަސައްކަތްތައް ހަލުވިކޮށް ޒަމާނީކުރުމަށް ބޭއްވި ހާއްސަ ރަސްމިއްޔާތެއްގައި ވާހަކަ ދައްކަވަމުން އުއްތަމަފަނޑިޔާރު ވިދާޅުވީ، މި އާ ނިޒާމަކީ މައްސަލަތައް އަވަހަށް ނިންމުމަށް ލިބިގެންދާނެ ވަރަށް ބޮޑު އެހީއެއް ކަމަށެވެ.
މި ނިޒާމު ފަރުމާކޮށްފައިވަނީ ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަނުން ކަމަށާއި، މިހާރު ކްރިމިނަލް ކޯޓުގައި މީގެ ހިދުމަތް ބޭނުންކުރަމުން އަންނަ ކަން ފާހަގަކޮށްލެވެއެވެ.
އުއްތަމަފަނޑިޔާރު ވިދާޅުވީ، މަގާމާ ހަވާލުވެވަޑައިގެން މާލޭގެ ކޯޓުތަކަށް ކުރެއްވި ޒިޔާރަތްތަކުން، ޝަރުއީ ނިޒާމަށް ގިނަ ގޮންޖެހުންތަކެއް ހުރިކަން ފާހަގަކުރެވިފައިވާ ކަމަށެވެ. އެގޮތުން ޓެކްނޮލޮޖީގެ ހައްލުތަކުގެ އިތުރުން ބައެއް ގާނޫނީ ހުރަސްތައްވެސް އެބަހުރި ކަމަށާއި، އެކަންކަން ހައްލުކުރުމަށް ބަންޑާރަނައިބާ ގުޅިގެން މަސައްކަތް ކުރައްވާނެ ކަމުގެ ޔަގީންކަން އުއްތަމަފަނޑިޔާރު ދެއްވި އެވެ.
