ތުޅާދޫ ދާއިރާގެ މެންބަރު އަބްދުލްހައްނާން އަބޫބަކުރު ހުދަހެޅުއްވި އެ ބިލާ ގުޅޭ ގޮތުން މަޖިލީހިހެ މިއަދުގެ ޖަލްސާގައި ހިތަދޫ ދެކުނު ދާއިރާގެ މެމްބަރު ނާޒިލް ވިދާޅުވީ ސަރުކާރަށް މި ހިސާބަށް އާދެވުނީ މީޑިއާގެ މިނިވަންކަމުގެ ސަބަބުން ކަމަށެވެ.
އެހެންވެ، މީޑިއާގެ މިނިވަންކަމުގެ ދަރަޖައިން ރާއްޖެ ފަހަތަށްދާ ގޮތަށް އޮތް ބިލަކަށް ސަރުކާރުން ތާއީދުކޮށް ގޯސް ހަދަންވީ ކީއްވެތޯ ނާޒިލް ސުވާލު އުފެއްދެވި އެވެ.
ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވިދާޅުވީ މިހާރު ހުށަހަޅާފައިވާ ބިލަކީ ދުނިޔޭގެ ބެސްޓްޕްރެކްޓިސްތަކާ ހިލާފު ބިލެއް ކަމަށެވެ.
މިއަދުގެ ޖަލްސާގައި ވާހަކަ ދައްކަވަމުން ވެލިދޫ ދާއިރާގެ މެންބަރު މުހައްމަދު އައްބާސް ވެސް ވަނީ އެ ބިލަށް ވަރަށް ބޮޑަށް ފާޑުވިދާޅުވެފަ އެވެ. އޭނާ ވިދާޅުވީ، ބިލު ފަރުމާކޮށްފައި އޮތް ގޮތުން ބިލުގެ މައިގަނޑު ބޭނުމެއް ކަމަށް ފެންނަނީ ސަރުކާރުގެ ވައްކަންތައް ފޮރުވައި ހުދުމުހުތާރު ވެރިކަމަށް ޖާގަ ދިނުން ކަމަށެވެ.
މީޑިއާ ވެސް ހިންގަން ޖެހޭނީ ވަކި ހުދޫދަކާއި އިމެއްގެ ތެރެއިން ކަމަށް ގަބޫލުކުރައްވާ ކަމަށާއި އެކަމަކު މިހާރު ހުށަހަޅާފައި އޮތް މީޑިއާތަކާ ބެހޭ ބިލު އެ އޮތްގޮތަށް ފާސްކުރަން ދެކޮޅު ކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަހުމަދު އަޒާން ވެސް މިއަދު ވަނީ ވިދާޅުވެފަ އެވެ.
އަޒާން ވިދާޅުވީ، ކޮމިޝަނުން މައްސަލައެއް ބަލަން ފެށުމާ އެކު ނޫހެއް ހުއްޓުވާލެވޭ ގޮތަށް ބިލުގައި އޮތް އޮތުމަށް ތާއީދުނުކުރައްވާ ކަމަށެވެ. އެއީ، އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށް އޭނާ ވިދާޅުވިއެވެ.
އެއަށް ފަހު، އޭނާ ވިދާޅުވީ މިދިޔަ ސަރުކާރުގައި ގަރާރެއް ނެރެގެން ވަކި ކަހަލަ ހިޔާލު ފާޅުކުރުން އޭރުގެ ރައީސް އިބްރާހިމް މުހައްމަދު ޞާލިޙް މަނާކުރެއްވި ކަމަށެވެ. ނަން ވިދާޅުނުވި ނަމަވެސް އޭނާ ފާހަގަކުރެއްވީ އޭރު ހިންގި "އިންޑިއާ އައުޓް" ކެމްޕޭނާ ދެކޮޅަށް ނެރުއްވި ރިޔާސީ ގަރާރުގެ ވާހަކައެވެ. އެ ގަރާރު މި ސަރުކާރުން ވެސް ބާތިލެއް ނުކުރެ އެވެ.
އެހެންވެ، މީޑިއާތަކާ ބެހޭ ބިލު އޮތް ގޮތަށް ފާސްކޮށްފި ނަމަ އެ ފަދަ ވެރިކަމެއްގައި އަނެއްކާ ވެސް ބައެއް ކަހަލަ ހިޔާލުތައް ހުއްޓުވާނެ ކަމަށް އޭނާ ވިދާޅުވި އެވެ. ނަަމަވެސް އެ ބިލާ އެއްކޮޅަށް ވާހަކަ ދެއްކެވި ޕީއެންސީގެ މެންބަރުން ވިދާޅުވީ މީޑިއާތައް ވެސް އުޅެން ޖެހޭނީ ހުދޫތަކެއްގެ ތެރޭގައި ކަމަށެވެ. އަދި މީޑިއާތަކުން އަމަލުކުރާ ގޮތުން އިޖްތިމާއީ ފޭރާން ގެއްލޭ ކަމަށް އެބޭފުޅުން ވިދާޅުވި އެެވެ.
އެގޮތުން، ޕީއެންސީގެ ޕީޖީ ލީޑަރު އިނގުރައިދޫ ދާއިރާގެ މެންބަރު އިބްރާހިމް ފަލާހު އެ ބިލްގައި ބަހުސްގައި މަޖިލީހުގައި މިއަދު ވާހަކަ ދައްކަވަމުން ދާޅުވީ ބިލަށް ފުރިހަމައަށް ތާއިދުކުރާ ކަމަށާއި އެ ބިލްގައި މީޑިއާގައި މަސައްކަތް ކުރާ ފަރާތަކަށް ހުރަހެއް އޮތް ކަމަކަށް ގަބޫލެއް ނުކުރެއްވޭ ކަމަށެވެ. އަދި އޭނާ ވަނީ މިއަދު ބިލް ބަލައިގަންނަން ޕީއެންސީގެ ޕީޖީ ގްރޫޕުން ވޯޓް ދޭނޭ ކަމަށް ވެސް ވިދާޅުވެފަ އެވެ.
އެ ބިލް ދިފާއު ކުރައްވަމުން އޭނާ ވިދާޅުވީ މީޑިއާތަކުން ދޮގު މައުލޫމާތު ފަތުރާ، މީހުންގެ އަނބުރު ނަގާލުމުގެ ސަބަބުން ހުދު އޭނާއަކީ އޭގެ ތަކުލީފު އުފުލަން ޖެހުނު މީހެއް ކަމަށެވެ. ފަލާހު ވިދާޅުވި ގޮތުގައި އޭނާ އެއްޖިންސުން ގުޅުން ހިންގާ ކަމަށް ތުހުމަތުކޮށް ހަދާފައިވާ ވީޑިއޯއެއް ދައުރުކޮށް މީޑިއާއިން އޭނާއަކީ އެއްޖިންސުން ގުޅުން ހިންގާ މީހަކަށް ހެދި ކަމަށެވެ.
އެކަމުން އޭނާ އާއި އާއިލާއަށް ފުން އަސަރުކުރިކަން ފާހަގަކުރައްވާ ފަލާހު ވިދާޅުވީ އެކަހަލަ ދޮގު ހަބަރު ފަތުރާ މީހުން އުލު ބައިދަންވީ ކަމަށެވެ.
ނޫސްވެރިކަމުގެ މިނިވަންކަމަށް ނުރައްކާތެރި މާއްދާތަކެއް ހިމަނާފައިވާ އެ ބިލު ބަލައިނުގަންނަ ކަން މޯލްޑިވްސް މީޑިއާ ކައުންސިލާއި މޯލްޑިވްސް ޖާނަލިސްޓްސް އެސޯސިއޭޝަނުން ހާމަކޮށްފައިވާއިރު، އެ ބިލާ ދެކޮޅަށް ނޫސްވެރިން އަންނަނީ މަސައްކަތް ކުރަމުންނެވެ.
މި ބިލަށް ބަހުސް ކުރައްވަމުން ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވީ މީޑިއާ ރެގިއުލޭޓް ކުރަން ކޮމިޝަނެއް ހެދުމުގެ ނަމުގައި ހުށަހަޅާފައި އޮތީ ވަރަށް ހީލަތްތެރި ބިލެއް ކަމަށެވެ. އަދި މިނިވަން ނޫސްވެރިކަން ބަންދުކުރަން ކުރާނޭ ހުރިހާ ކަމެއް އެ ބިލުގައި ތަންފީޒުކުރަން ހިމަނާފައިވާ ކަމަށް ޒިޔާދު ވިދާޅުވި އެވެ.
އެ ބިލުގެ ބަހުސް މިހާރު ކުރިއަށްދާއިރު އެ ބިލް އަނބުރާ ގެންދިޔުމަށް، މޯލްޑިވްސް މީޑިއާ ކައުންސިލް (އެމްއެމްސީ) އަދި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) ގެ އިތުރުން ގިނަ އަދަދެއްގެ ނޫސްވެރިން ވަނީ ގޮވާލައިފަ އެވެ. އަދި ބިލް އަނބުރާ ގެންދިޔުމަށް އެންމެ ބޮޑު އިދިކޮޅު ޕާޓީ، އެމްޑީޕީން ވެސް ވަނީ ގޮވާލާފަ އެވެ.
މިހާރު އެ ބިލުގައިވާ ގޮތުން، އެ ބިލު ގާނޫނަކަށް ވުމާ އެކު، މިހާރު އޮތް މީޑިއާ ކައުންސިލާއި ބްރޯޑްކާސްޓިން ކޮމިޝަން އުވޭނެ އެވެ. އެެއަށް ފަހު އެތަނުގެ މަސައްކަތްތައް ކުރިއަށް ގެންދާނީ 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން' ނަމުގައި ރައީސް އުފައްދަވާ އޮފީހަކުންނެވެ.
