ރައްޔިތުންގެ މަޖިލީހުން ދައުރުން ބޭރުން މިދިޔަ ބުދަ ދުވަހު ބޭއްވި ޖަލްސާގައި މީޑިއާ ބިލަށް ވާހަކަދައްކަމުން ފަލާހު ވިދާޅުވީ އޭނާއާ ގުޅޭ ގޮތުން ބައެއް މީޑިއާތަކުން ދޮގު ހަބަރުތަކެއް މީގެ ކުރިން ފަތުރާފައިވާ ކަމަށާއި އެފަދަ މީޑިއާތައް އުލުބައިންދަންޖެހޭ ކަމަށެވެ.
ފަލާހުގެ މި ވާހަކަތަކާ ގުޅިގެން އެ މައްސަލަ ތަހުގީގުކޮށްދިނުމަށް އެދި ދިވެހި ނޫސްވެރިންގެ ޖަމިއްޔާ (އެމްޖޭއޭ) އިން ވަނީ ފުލުހަށް މައްސަލައެއް ހުށަހަޅާފަ އެވެ.
މީޑިއާތަކަށް ފުލުހުން ފޮނުވި މެސެޖެއްގައި ބުނީ މަޖިލީހުގައި ފަލާހު ދެއްކެވި ވާހަކަ ތަހުގީގު ކުރުމާމެދު ގާނޫނީ ލަފައެއް ހޯދަން އިއްޔެ ބަންޑާރަނައިބުގެ އޮފީހަށް ހުށަހަޅާފައިވާ ކަމަށެވެ.
ފުލުހުން އެހެން ބުނުމާ ގުޅިގެން އެކްސްގައި ކުރެއްވި ޕޯސްޓެއްގައި ފަލާހު ވިދާޅުވީ އޭނާ "މީހަކު މަރަން ބުނެފައެއް" ނޯންނާނެ ކަމަށެވެ.
ފުލުހުން އޭނާގެ ވާހަކަ ތަހުގީގު ކުރުމާ މެދު ގާނޫނީ ލަފައަކަށް އެދުން ފަލާހު ސިފަ ކުރެއްވީ "ވަރަށް ރަނގަޅު ނިންމެވުމެއް"ގެ ގޮތުގަ އެވެ. ދެން ވިދާޅުވީ ޖަލަށް ލައިފި ނަމަ، އެތަނުން އޭނާއާ ރަހުމަތްތެރިވާނެ މީހުންގެ ވާހަކަ އެވެ.
ފަލާހު ޖަލްސާގައި ދެއްކެވި ވާހަކައާ ގުޅިގެން ނޫސްވެރިން ތަކުރާރުކޮށް ސުވާލު ކުރުމުން ރައީސް ޑރ. މުހައްމަދު މުއިއްޒު ވިދާޅުވީ އެގޮތަށް ނުބުނެވޭނެ ކަމަށާއި އެކަން ބަލާނެ ކަމަށެވެ. ރަދީފުގައިވާ ގޮތުން އުލުބޭންދުމަކީ އިހުޒަމާނުގައި މީހުން މަރަން ހަދާ ގޮތެކެވެ.
ފަލާހުގެ މަޖިލީހުގައި ދެއްކެވި އެ ވާހަކައާ ގުޅިގެން އެތައް ބަޔަކު ގެންދަނީ އޭނާއަށް ފާޑުކިޔަމުންނެވެ. އޭގެތެރޭގައި ގާނޫނީ ބޭފުޅުންނާއި އާންމުންގެ އިތުރުން ނޫސްވެރިން ވެސް ހިމެނެ އެވެ.
