ޕެޓޮންގްޓާން އަކީ ތައިލެންޑުގެ ބޮޑުވަޒީރުގެ މަގާމު ފުރުއްވާފައިވާ އުމުރުގެ ގޮތުން އެންމެ ހަގު ބޭފުޅާ އެވެ. އުމުރުން 37 އަހަރުގެ ޕެޓޮންގްޓާންނަކީ ތައިލެންޑުގެ ކުރީގެ ބޮޑުވަޒީރު ތަކްސިން ޗިނަވާތުގެ ދަރިކަނބަލުންނެވެ. ދުސްތޫރީ ކޯޓުގެ ނިންމުމާއެކު އޭނާ ވެވަޑައިގެންފައި މި ވަނީ ތައިލެންޑުގެ ބޮޑުވަޒީރުގެ މަގާމު ފުރުއްވި ބޭފުޅުންގެ ތެރެއިން މަގާމުން ވަކިކޮށްފައިވާ ޗިނަވާތު އާއިލާއަށް ނިސްބަތްވާ ނުވަތަ ގުޅުންހުރި ހަވަނަ ބޭފުޅާއަށެވެ. އޭނާ ވެރިކަންކުރައްވާފައި ވަނީ އެންމެ އަހަރެކެވެ.
ޕެޓޮންގްޓާން މަގާމުން ދުރުކުރިއިރު އޭނާ ހުންނެވީ ފޯން މެދުވެރިކޮށް ކެމްބޯޑިއާގެ ކުރީގެ ބޮޑުވަޒީރު ހުންސެން އާއެކު، ތައިލެންޑްގެ ގައުމީ މަސްލަހަތަށް ނުރައްކާވާފަދަ ވާހަކަތަކެއް ދެއްކެވި މައްސަލައެއް ފެންމަތިވެގެން އެމައްސަލައިގެ ހަގީގަތް ބެލުމަށްޓަކައި ފެށި ތަހުގީގު ނިމެންދެން ސަސްޕެންޑު ކޮށްފައެވެ. ސަސްޕެންޝަންގައި އެކަމަނާ ހުންނަވާތާ މިހާރުވަނީ ގާތްގަނޑަކަށް ދެމަސް ވެފައެވެ.
އެ ކޯލްގައި އޭނާއަށް ތައިލެންޑުގެ ބޮޑުވަޒީރު މުހާތަބުކުރައްވަނީ "އަންކަލް" ގެ ގޮތުގަ އެވެ. އެ ކޯލްގައި ތައިލެންޑުގެ އަސްކަރީ ކޮމާންޑަރުންނަކީ އިދިކޮޅު މީހުން ކަމަށް ވެސް ބޮޑުވަޒީރު ވިދާޅުވެ އެވެ.
ކޯޓު ހުކުމުގައި ބުނެފައިވަނީ ޕެޓޮންގްޓާން އަކީ ގައުމުގެ މަސްލަހަތަށް ވުރެ އަމިއްލަ މަސްލަހަތަށް އިސްކަން ދެއްވާ ބޭފުޅެއްް ކަމަށާއި ގައުމުގެ އަގު ވައްޓާލާފައިވާ ބޭފުޅެއް ކަމަށެވެ. އަދި އެކަމުގެ ސަބަބުން އޭނާއަށް އާންމުން ކުރާ އިތުބާރު ދަށަށް ގޮސްފައިވާ ކަމަށެވެ.
ޕެޓޮންގްޓާން މަގާމުން ވަކިކުރަން ހަ ފަނޑިޔާރަކު ވޯޓު ދެއްވި އެވެ. ދެކޮޅަށް ދެއްވީ ތިން ފަނޑިޔާރެކެވެ. މިއީ 2008 ގެ ފަހުން ތައިލެންޑުގައި މަގާމުން ވަކިކުރި ފަސް ވަނަ ބޮޑުވަޒީރެވެ.
ތައިލެންޑްގައި އެންމެ ބާރުގަދަ ފަރާތަކީ އެގައުމުގެ ރަސްގެފާނެވެ. ދެން އެގައުމުގެ އަސްކަރިއްޔާ އެވެ. ތައިލެންޑްގެ އަސްކަރިއްޔާ އެގައުމުގެ ސިޔާސީ މަސްރަހުގައި ބާރުގަދަވުމުގެ ސިއްރަކީ އެގައުމުގެ ރަސްކަމުގެ ނިޒާމަށް ލޯކަނު ތާއީދެއްކޮށް ރަސްކަމުގެ ނިޒާމު ދަމަހައްޓަން އެހީތެރިވާތީ ކަމަށް އެގައުމުގެ މަސްރަހު ދިރާސާ ކުރާ ފަރާތްތައް ބުނެއެވެ.
ޕެޓޮންގްޓާން ބޮޑުވަޒީރުކަމުގެ މަގާމުން ދުރުކުރީ ތައިލެންޑްގެ ދުސްތޫރީ ކޯޓުން ކަމަށްވިޔަސް މިކަމުގެ ފަހަތުގައި ތައި އަސްކަރިއްޔާ އޮތުމަކީ އެކަށީގެންވާ ކަމެއްކަމަށް ރިޕޯޓްތައް ބުނެ އެވެ.
