މިއަދު ފާހަގަކުރަމުންދާ ދިވެހި ރާއްޖޭގެ އިންޖިނޭރުންގެ ދުވަހުގެ މުނާސަބަތުގައި ރައީސް ފޮނުއްވި ހިތާބުގައި ވާ ގޮތުން އުމްރާނީ ތަރައްގީ ގެ އިތުރުން ސިނާއީ، އިޖްތިމާއީ، ދަތުރުފަތުރު، ހަކަތައާއި ސައިންސް އަދި ޓެކްނޮލިޖީގެ ދާއިރާގައި ތަފާތު އެކި ފަންނުގެ އިންޖިނޭރުން ރާއްޖޭގައި މަސައްކަތް ކުރަމުން އަންނަ ކަމަށާއި މި ގައުމުގެ ތަރައްގީ ގައި އެބޭފުޅުންގެ ރޯލް އިންތިހާ އަށް މުހިންމު ކަމަށެވެ.
ރައީސްގެ ހިތާބުގައި ވާގޮތުން މި ދުވަސް ދިމާވެފައި ވަނީ ރާއްޖޭގައި މިހާތަނަށް ކުރެވިފައިވާ އިންޖިނޭރިންގެ އެންމެ ބޮޑު މަސައްކަތް ކަމުގައި ސިނަމާލޭ ހުޅުވުނުތާ 7 އަހަރު ފުރުން ދުވަހާ ކަމަށާއި މި ބްރިޖް ގެ ސަބަބުން މާލެ އަދި ހުޅުމާލޭގެ ރައްޔިތުން ކަނޑު ހުރަސް ކޮށް ކުރަންޖެހިފައިވާ ދަތުރުތަކަށް ވަރަށް ބޮޑު ލުޔެއް ލިބިގެންގޮސްފައިވާ ކަމުގަ އެވެ.
މީގެ އިތުރުން ފާއިތުވެ ދިޔަ 7 އަހަރުގެ ތެރޭގައި ދިވެހިންގެ ދިރިއުޅުމަށާއި އިޖްތިމާއި ހުރިހާ ހިދުމަތަކަށް ވަރަށް ބޮޑު ހެޔޮ ބަދަލެއް މި ބްރިޖްގެ ސަބަބުން ގެނެވިފައިވާ ކަން މި ހިތާބުގައި ރައީސް ވަނީ ފާހަގަ ކުރަވާފައި އެވެ. ރައީސް އިތުރަށް ފާހަގަ ކުރެއްވި ގޮތުގައި މިކަމުން ފާހަގަ ވެެގެން ދަނީ އިންޖިނޭރިންގްގެ މިފަދަ ބޮޑު މަސައްކަތްތަކުގެ ސަބަބުން ގައުމަކަށް އަންނާނެ ހެޔޮބަދަލާއި ހަލުވި ކުރިއެރުން ކަމުގަ އެވެ.
ރައީސް އިތުރަށް ފާހަގަ ކުރެއްވިގޮތުގައި ރާއްޖެއަށް ލިބިފައިވާ ހާއްސަ ސިފަތަކާއެކު ރަށްވެހިކަމާއި ތަމައްދުންގެ ޒަމާނީ ކުރިބޯށިތަކާއި ހަމަޔަށް ދެވޭނީ ހަމަ ދިވެހި އިންޖިނޭރުންގެ ވިސްނުމާއި ރޭވުންތެރިކަމުން މަގުދައްކައިދީގެން ކަމުގަ އެވެ.
ރައީސް ވަނީ އަންނަ 2026 ވަނަ އަހަރުން ފެށިގެން އިންޖިނޭރުންގެ ގައުމީ އެވޯޑް ދޭން ފަށާނެ ކަމުގެ ޔަގީން ކަން މި ހިތާބުގައި ދެއްވާފައި އެވެ.
މީގެ އިތުރުން އިންޖިނޭރުންގެ އިލްމީ ދިރާސާތަކަށް ފުރުސަތު ފަހިކޮށްދީ އެކި ދާއިރާތަކުން އިންޖިނޭރުކަން ކިޔަވައިދީ ތަމްރީނު ދިނުމަށް ސަރުކާރުން އިތުރަށް ސަމާލުކަން ދޭނެ ކަމަށް ރައީސް ވަނީ ވިދާޅުވެފައި އެވެ.
