ކިޑްނީ ބަލީގެ މީހުންނަށް ރާއްޖޭގެ އެކި ހިސާބުތަކުން ފަސޭހަކަމާއެކު ފަރުވާ ލިބޭނެ ގޮތް ހެދުމުގެ މަގްސަދުގައި ކުރާ މި މަސައްކަތަކީ ސަރުކާރުގެ މުހިންމު އަމާޒެކެވެ.
ރާއްޖޭގައި ގައިންގަޔަށް ނާރާ ބަލިތަކުގެ ތެރެއިން ކިޑްނީ ބައްޔަކީ ދައުލަތުން ބޭސްފަރުވާއަށް އެންމެ ބޮޑު ހަރަދެއް ކުރާ އެއް ބައްޔެވެ. ހެލްތް މިނިސްޓްރީގެ ތަފާސްހިސާބުތައް ދައްކާގޮތުން 2023 ވަނަ އަހަރުގެ ނޮވެންބަރު މަހާ ހަމައަށް، ފާއިތުވި 12 އަހަރުގެ ތެރޭގައި ރާއްޖޭގެ 10 އަތޮޅެއްގައި ގާއިމުކޮށްފައިވަނީ 42 ޑަޔަލިސިސް ޔުނިޓެވެ. ނަމަވެސް މި ސަރުކާރުން މި ކުރު މުއްދަތުގެ ތެރޭގައި 8 އަތޮޅެއްގައި 18 ޔުނިޓް ގާއިމުކުރުމުގެ އިތުރުން، ކުރިން ހިދުމަތްދެމުން އައި ދެ ސެންޓަރެއްގެ ހިދުމަތް ފުޅާކޮށް އިތުރު 4 ޔުނިޓް ވަނީ ގާއިމުކޮށްފައެވެ.
ސަރުކާރުގެ އަމާޒަކީ މިއަހަރުގެ ސެޕްޓެމްބަރު މަހުގެ ނިޔަލަށް ރާއްޖޭގެ ހުރިހާ އަތޮޅަކުން ޑަޔަލިސިސްގެ ހިދުމަތް ލިބޭނެ ގޮތް ހެދުމެވެ. މިވަގުތު މި ހިދުމަތް ނުލިބެނީ އދ. އަތޮޅާއި، ވ. އަތޮޅާއި، ފ. އަތޮޅުގެ އިތުރުން ދ. އަތޮޅުގައެވެ. މީގެ އިތުރުން، އާބާދީ ބޮޑު ސަރަހައްދުތައް ކަމަށްވާ ކުޅުދުއްފުށި، އައްޑޫ އަދި ޅ. އަތޮޅު ހޮސްޕިޓަލުގައި މި ހިދުމަތް އިތުރަށް ތަރައްގީކުރުމުގެ މަސައްކަތްވެސް ދަނީ ކުރަމުންނެވެ.
