ވެރިރަށް ޖަކާޓާގެ ބޭރުގައި މުޒާހަރާގެ އިތުރަށް ފެތުރި، ސަރަހައްދީ ޕާލަމެންޓްގެ ބައެއް އިމާރާތްތަކުގައި އަލިފާން ރޯކޮށްލުމާއެކު އިންޑޮނޭޝިއާގެ ރައީސް ޕްރަބޯވޯ ސުބިއަންޓޯ ވަނީ ޗައިނާއަށް ރާވާފައިވާ ދަތުރެއް ކެންސަލް ކޮށްލާފައި ކަމަށް ހަބަރު ފަތުރާ ވަސީލަތްތަކުން ބުނެ އެވެ
ޖަޕާނުން ރަސްމީކޮށް އަމާން ދިނުމާއި ގުޅިގެން ދެވަނަ ބޮޑު ހަނގުރާމަ ނިމުނުތާ 80 އަހަރު ފުރުން ފާހަގަކުރުމުގެ ގޮތުން ސެޕްޓެމްބަރު މަހުގެ ތިން ވަނަ ދުވަހު ޗައިނާގައި ބާއްވާ "ނަސްރުގެ ދުވަސް" ޕެރޭޑެއްގައި ޕްރަބޯވޯ ބައިވެރިވާން ކުރިން އޮތީ ހަމަޖެހިފައި އެވެ.
ގާތްގަނޑަކަށް އަހަރެއްހާ ދުވަސްވީ ޕްރަބޯވޯގެ ސަރުކާރަށް ފުރަތަމަ ބޮޑު ޓެސްޓެއް ކަމަށްވާ މި ހަފްތާގައި ޖަކާޓާގައި ގާނޫނު ހަދާ މަޖިލީހުގެ މެމްބަރުންގެ މުސާރައާ ގުޅިގެން ފެށި މި މުޒާހަރާތައް ގޯސްވީ ފުލުހުންގެ ވެހިކަލަކުން ޖެހި ޑިލެވެރީ ކުރަން ނިކުމެ އުޅުން މީހެއްގައިގައި ޖެހި އޭނާ މަރު ވުމުންނެވެ.
ރިޔާސީ ތަރުޖަމާނު ޕްރަސެޓިއޯ ހާދީ ހޮނިހިރު ދުވަހު ނެރުނު ވީޑިއޯ ބަޔާނެއްގައި ވިދާޅުވި ގޮތުގައި ރައީސް ބޭނުންވަނީ ސީދާ (އިންޑޮނޭޝިއާގެ ހާލަތު) މޮނިޓަރ ކުރަމުން ގެންދަން ކަމަށާއި އެ މަނިކުފާނު ބޭނުންފުޅުވަނީ މިކަމަށް އެންމެ ރަނގަޅު ހައްލެއް ގެނެއުމަށް ކަމަށެވެ.
ދަތުރު ކެންސަލް ކުރަންޖެހުނީ ސެޕްޓެމްބަރު މަހު އދ.ގެ އާންމު މަޖިލީހުގެ ޖަލްސާގެ ސަބަބުން ކަމަށް ޕްރަސެޓިއޯ ވިދާޅުވި އެވެ.
ހޮނިހިރު ދުވަހު މުޒާހަރާގެ ބައިވެރިން ވަނީ ތިން ސަރަހައްދެއްގެ ސަރަހައްދީ ޕާލަމެންޓް އިމާރާތްތަކުގައި އަލިފާން ރޯކޮށްލާފައި ކަމަށް ލޯކަލް މީޑިއާތަކުން ރިޕޯޓްކޮށްފައިވެ އެވެ.
ލޯކަލް މީޑިއާތަކުން ބުނީ ސިރެބޮންގައި މުޒާހަރާގެ ބައިވެރިން ޕާލަމެންޓްރީ އޮފީހުގެ ސާމާނު ލޫޓުވާލާފައިވާ ކަމަށާއި ޕެކަލޮންގާން އާއި ހުޅަނގު ނޫސާ ޓެންގަރާގައި މުޒާހަރާ ކުރި މީހުން ރޫޅާލުމަށް ފުލުހުން ކަރުނަ ގޭސް ޖަހާފައިވާ ކަމަށެވެ.
ސައުތު ސުލަވޭސީ ޕްރޮވިންސްގެ ވެރިރަށް މަކާސާރުގައި ހުންނަ ޕާލަމެންޓް އިމާރާތެއްގައި ހުކުރު ދުވަހު ދިން ހަމަލާއެއްގައި ތިން މީހަކު މަރުވެފައިވާ ކަމަށް އިންޑޮނޭޝިއާގެ ޑިޒާސްޓާ މެނޭޖްމަންޓް އެޖެންސީން ބުނެފި އެވެ.
ދައުލަތުގެ ނޫސް އެޖެންސީ އަންތާރާ އިން ބުނީ އަނދަމުންދާ އިމާރާތުގައި މީހުން ތާށިވެފައި ތިބި ކަމަށާއި އަލިފާނުގެ ހާދިސާއިން ސަލާމަތްވުމަށް އިމާރާތުން ފުންމާލައިގެން ދެ މީހަކަށް އަނިޔާވެފައިވާ ކަމަށެވެ.
ލޯކަލް މީޑިޔާތަކުން ރިޕޯޓްކޮށްފައިވާ ގޮތުގައި މަކާސާރު މަޖިލިސް އިމާރާތުގައި އަލިފާނުގެ ހާދިސާއެއް ހިނގައި އިތުރު މީހަކު މަރުވެއްޖެ އެވެ.
މުޒާހަރާގެ ބައިވެރިންނާ ދެކޮޅަށް ބާލީގައި ވެސް ކަރުނަގޭސް ބޭނުންކޮށްފައިވާކަމަށް ހަބަރު ލިބެއެވެ.
އަދި ސިޔާސީ ޕާޓީ ނަސްޑެމްގެ ގާނޫނު ހަދާ މަޖިލީހުގެ މެމްބަރެއް ކަމަށްވާ އަހުމަދު ސަހްރޯނީގެ ޖަކާޓާގެ ގެ ފޭރިގަނެ ގޭތެރޭގެ ފަރުނީޗަރު ހިމެނޭ ގޮތަށް ތަކެތި ނަގާފައިވާ ކަމަށް ވެސް ލޯކަލް މީޑިއާތަކުން ރިޕޯޓްކޮށްފައިވެ އެވެ.
