ފުލުހުންގެ ބުނީ މި މައްސަލައާ ގުޅިގެން ހައްޔަރުކުރެވިފައިވަނީ ބަންގްލަދޭޝްގެ 37 އަހަރުގެ ދެ ފިރިހެނުންނެވެ. އަދި މި ދެ މީހުން ހައްޔަރުކުރެވިފައިވަނީ ހާދިސާ ހިނގި ތަނުން ކަމަށާއި މި ދެ މީހުންނަކީވެސް ރަހީނުކުރުމާއި މާރާމާރީގައި ސީދާ ބައިވެރިވެފައިވާ ފަރާތްތައް ކަމަށް ކޯޓުގައި ފުލުހުން ވަނީ ބުނެފަ އެވެ.
ޝައްކުކުރެވޭ ދެ ފަރާތާ ދެކޮޅަށް ހެކީގެ ގޮތުގައި، ހާދިސާ ހިނގި ސަރަޙައްދުގެ ފޮޓޯތަކާއި އަނިޔާ ލިބުނު މީހާގެ ފޮޓޯތައް ފުލުހުންގެ ފަރާތުން ކޯޓަށް ހުށަހެޅުމުން މި ހެކިތަކުގެ މައްޗަށް ބިނާކޮށް، ޝައްކުކުރެވޭ މިންވަރަށް ހެކި ލިބިފައިވާކަމަށް ކްރިމިނަލް ކޯޓުން ނިންމަވައި، އެ ދެ ބިދޭސީންގެ ބަންދުގެ މުއްދަތު 15 ދުވަހަށް އިތުރުކުރުމަށް ވަނީ ހުކުމް ކޮށްފަ ކަމަށް ވެސް ފުލުހުން ބުނެއެވެ.
މި މައްސަލައިގައި ހައްޔަރުކުރެވުނު ދެ ބިދޭސީންނަކީވެސް ގަވާއިދާ ހިލާފަށް ރާއްޖޭގައި ދިރިއުޅެމުންދިޔަ ދެ މީހުން ވެސް ފުލުހުން ބުނެ އެވެ. އަދި ރަހީނުކުރެވުނު ފަރާތަށް އެކި ވަރުގެ އަނިޔާތައް ލިބިފައިވާކަމަށް ވެސް ކޯޓުގައި ފުލުހުން ވަނީ ބުނެފަ އެވެ.
މި މައްސަލައާ ގުޅޭގޮތުން އިތުރު ތަފްސީލުތައް ފުލުހުންގެ ފަރާތުން މިހާތަނަށް ހާމަ ކޮށްފައެއް ނުވެ އެވެ.
