ފެންކާ ކޯޕަރޭޝަންއިން ނެރުން ނޫސް ބަޔާނުގައި ބުނެފައިވަނީ ރޭ މެންދަމު 2:40 ހާއިރު އެ ކުންފުނީގެ އެލާމް ސިސްޓަމަށް ނޮޓީފިކޭޝަންތައް ލިބުން ކަމަށާއި އައްޑޫގެ ގުޅިފައިވާ ރަށްތަކުން ކަރަންޓުގެ ހިދުމަތް ކެނޑުނުކަން ސަމާލުކަމަށް އައުމުން ވީ އެންމެ އަވަހަކަށް ކަރަންޓުގެ ހިދުމަތް ދިނުމަށް އެ ކުންފުނީގެ މުވައްޒިފުން ވަގުތުން ހަރަކާތްތެރިވި ކަމަށެވެ.
އެ ނޫސްބަޔާނުގައި އިތުރަށްވާ ގޮތުން ފަތިހު 5:55 ހާއިރު އައްޑޫގެ ހުރިހާ ރަށަކަށް ކަރަންޓު ފޯރުކޮށްދެވިފައިވާ ކަމަށާއި ކަރަންޓު ކެނޑެން މެދުވެރިވީ އައްޑޫގެ 41 ނަންބަރު ސަބްސްޓޭޝަންގެ ކޭބަލަކަށް މީހަކު ގެއްލުންދޭން އުޅުމުގެ ތެރޭގައި ކަރަންޓު ޝޯޓެއް ހިނގައި ސެންޓްރަލް ޕަވަރ ހައުސް އެކޮށް ޑައުންވުމުގެ ސަބަބުންކަމަށް ދެނެގަނެވިފައިވާކަމަށްވެ އެވެ.
މި މައްސަލާގައި އިތުރަށް ބަލަންޖެހޭ ކަންކަން، ކަމާ ބެހޭ މުއައްސަސާތަކާއި ގުޅިގެން އެ ކުންފުނިން ކުރަމުންގެންދަނެ ކަމަށް އެ ކުންފުނިން ބުނެ އެވެ.
އައްޑޫ ސިޓީގެ ކަރަންޓުގެ ހިދުމަތަށް ދާއިމީ ހައްލެއް ހޯދުމަށް މަސައްކަތް ކުރަމުން އަންނަ ކަމަށާއި ކަރަންޓު ކެނޑުމުގެ ސަބަބުން ރައްޔިތުންނަށް ދިމާވާ އެކި ދަތި ތަކަށް އެ ކުންފުނިން މާފަށް އެދޭ ކަމަށް އެ ކުންފުނިން ބުނެ އެވެ.
