އޭނާ ވިދާޅުވީ، ގައުމުގެ އުފެއްދުންތެރިކަމާއި ކުރިއެރުން ގުޅިފައިވަނީ ރައްޔިތުންގެ ފުރިހަމަ ސިއްހަތާ ކަމަށެވެ. މިނިސްޓަރު ނާޒިމް މިފަދައިން ވިދާޅުވީ ހުޅުމާލޭ ދެވަނަ ފިޔަވަހީގައި ބޭއްވި ހާއްސަ މެޑިކަލް ކޭމްޕެއް ފެށުމުގެ ރަސްމިއްޔާތުގައި ދެއްވި ވާހަކަފުޅުގައެވެ.
ރާއްޖޭގައި ދުންފަތުގެ އިސްތިޢުމާލުކުރާ މީހުންގެ ނިސްބަތް މަދުކުރުމަށް ސަރުކާރުން އަޅާފައިވާ ފިޔަވަޅުތައް ތަންފީޒުކުރުމުގައި މުޅި މުޖުތަމަޢުގެ އެއްބާރުލުން ކޮންމެހެން ބޭނުންވާކަން އެމަނިކުފާނު ވަނީ ފާހަގަކުރައްވާފައެވެ.
މިނިސްޓަރުގެ ވާހަކަފުޅުގައި، ސިއްހީ ދާއިރާއަށް މިހާރު އެންމެ ގުޅުން ހުރި މައިގަނޑު މައުލޫއެއް ކަމަށްވާ "ހެލްތު ބިއޯންޑް ހެލްތު" އަށް އަލިއަޅުވައިލެއްވިއެވެ. އެގޮތުން ދިރިއުޅުމުގެ ހުރިހާ ކަމެއް ވެސް ގުޅިފައި އޮންނަނީ ސިއްހަތާކަމަށް މިނިސްޓަރު ވިދާޅުވިއެވެ. އެންމެންގެ އެއްބާރުލުން ލިބިގެންނޫނީ ސިއްހީ ދާއިރާގައި އެދެވޭ މަންޒިލަކަށް ނުދެވޭނެކަން ފާހަގަކުރައްވަމުން، އެމަނިކުފާނު ވިދާޅުވީ ސިއްހީ ކަންކަން ކުރިއެރުވުމުގައި އެންމެން ބައިވެރިވެއްޖެނަމަ ޤައުމުގެ އުފެއްދުންތެރިކަން އިތުރުވެ، އުފާވެރި އާބާދީއެއް ދިރިއުޅޭ ޤައުމެއްގެ ގޮތުގައި ރާއްޖެ ވެގެން ދާނެކަމަށެވެ.
