ހުޅުމާލެ ފޭސް އެކަކުން ހިންގި އޮޕަރޭޝަނެއްގައި ހައްޔަރުކޮށްފައިވަނީ ހއ. ފިއްލަދޫ ސީރީންމަންޒިލް، މުޙައްމަދު ސަމީރު (29އ) އާއި ލ. ގަން ތުނޑި އަރާއިރު، އަލީ ހައިސަލް (37އ) އެވެ. މި ދެމީހުން ހައްޔަރުކޮށްފައިވަނީ މި މަހުގެ ހަތަރު ވަނަ ދުވަހުގެ ރޭ ފުލުހުން ހިންގި އޮޕަރޭޝަނެއްގައެވެ.
އެޕާޓްމަންޓު ބަލައިފާސްކުރިއިރު، ތިން މޯބައިލް ފޯނު، ތިން އަތުކުރީގަޑި، އެއް ޑްރޯން، އެއް ދޮށި، ދެ އަވިއައިނު، ރިހި ފަށަކާއި ރިހި އަނގޮޓިއެއް އަދި ހަ ވަޅި ފެނިފައިވެއެވެ. ފުލުހުން ބުނި ގޮތުގައި އެ ތަކެއްޗަކީ އެކި މީހުންގެ އަތުން ފޭރިފައިވާ ތަކެތި ކަމަށް ބެލެވެއެވެ.
މީގެ އިތުރުން ސަމީރާއި އަލީ ހައިސަލް ސޯޝަލް މީޑިއާ ބޭނުންކޮށް މީހުންނަށް ދުއްތުރާކޮށް، ވަޅިން ބިރުދައްކައި، އޮރިޔާން ވީޑިއޯ ހަދައި ފައިސާ ފޭރިގަތް އިތުރު ދެ މައްސަލަ ވެސް މިހާތަނަށް ރިޕޯޓުކޮށްފައިވާ ކަމަށް ފުލުހުން ބުންޏެވެ. މިހާރު މި ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އަލީ ހައިސަލް 4 ދުވަހަށް އަދި ސަމީރު 15 ދުވަހަށް ބަންދުކުރުމަށް ވަނީ އަމުރުކޮށްފައެވެ. ފުލުހުން ގެންދަނީ މި މައްސަލަތައް ތަހުގީގު ކުރަމުންނެވެ. އަދި މި ދެމީހުންގެ ފަރާތުން މިފަދަ އެއްވެސް ކަމެއް ދިމާވެފައިވާ ފަރާތެއް ވާނަމަ ފުލުހުންނަށް ރިޕޯޓުކުރުމަށް އިލްތިމާސްކޮށްފައިވެއެވެ.
