ދަރަނި ނަގަން ޖެހުން ގޮތާއި، ކިޔާ ފައިސާ ޗާޕްކުރުމާއި، ހުރިހާ ވާހަކަތަކެއް ރަނގަޅަށް ދައްކާލަން ރައްޔިތުންގެ މަޖިލިހަށް ހާޒިރުކޮށް އޭނާއާ ސުވާލުކުރުމަށް ކުރީގެ ފިނޭންސް މިނިސްޓަރު އިބްރާހީމް އަމީރު ގޮވާލައްވައިފިއެވެ.
Advertisement
އެކްސްގައި އަމީރު ކުރެއްވި ޕޯސްޓެއްގައި ވިދާޅުވީ ހުރިހާކަމެއް ރަނގަޅުކުރަން ކަމަށް ބުނެ އައި ސަރުކާރަށް ކުރެވުނު ކަމެއް ނެތްތާ ހުރިހާކަމެއް ގޯހުން ގޯހަށް ދާކަމަށެވެ.
" ކުރީ ސަރުކާރު، ކުރީ ސަރުކާރު ކިޔާތާ މިހާރު 2 އަހަރު ވެއްޖެ. އެއްވެސް ހާސްކަމެއް ނެތޭ، ހުސް ފެހި ސިގްނަލޭ ކިޔާ އައި މީހުން، އެއްކޮށް ގަބުވެ ދެން ކުރިޔަށް ދާނެ ގޮތެއް ނޭގިފަ. ހައްލު ކުރެވުނު ކަމެއް ނެތް، ހޯދުނު ކުރިއެރުމެއް ނެތް. ހުރިހާ ކަމެއް ގޯހުން ގޯހަށް." އަމީރު އެކްސްގައި ކުރެއްވި ޕޯސްޓުގައިވެއެވެ.
އަމީރު ވިދާޅުވީ މުޅި ދުނިޔެއަށް ދިމާވި ކޯވިޑްގެ ހާލަތާއިއެކުވެސް މިދިޔަ ސަރުކާރުން ިއގްތިސާދު ކުރިޔަށް ގެންގޮސްފައިވަނީ ޖުމްލަކޮށް ރަނގަޅުކޮށްކަމަށެވެ. އެގޮތުން ކޯވިޑާއި އެކު ދަށަށް ދިޔަ އިގްތިސާދު 2022 ވަނަ އަހަރު އޭގެ ކުރިން އޮތްވަރަށްވުރެ ރަނގަޅުކުރެވުނުކަމަށެވެ.
" މި ދިޔަ ސަރުކާރުގައި ކުރިމަތިލާން ޖެހުނު ދަތިތަކާއެކުވެސް، މާލީ އަދި އިގްތިސާދީ ސިޔާސަތު ގެންގޮސްފައިވާނީ ޖުމްލަކޮށް ރަނގަޅަށް. 2020 ވަނަ އަހަރު، ކޮވިޑްގެ ދަތިތަކާއެކު %33 ދަށަށް ދިޔަ އިގްތިސާދު، 2021 ވަނަ އަހަރު %38 ކުރިއަރައި 2022 ވަނައަހަރު ކުރީކޮޅު އޮތީ ކޮވިޑް އައި އިރު އޮތް އިގްތިސާދަށް ވުރެ ބޮޑު އިގްތިސާދަކަށް ބަދަލުކޮށްފަ. " އަމީރު ވިދަޅުވިއެވެ.
ކޮވިޑްގެ ވަބާއިން އަރައިގަނެ، އަމއްލަ ފަރުދުންނާއި ވިޔަފާރިތައް ސަލާމަތްވީ އޭރު އެޅުނު މާލީ، އިގްތިސާދީ އަދި އިޖްތިމާއީ ފިޔަވަޅުތަކުގެ ސަބަބުންކަމަށް އަމީރު ވިދާޅުވިއެވެ. އޭގެ ފަހުން އައި ޔުކްރެއިން-ރަޝިޔާ ހަނގުރާމައިގެ ސަބަބުން ދިމާވި ދަތިތައް ވެސް ވާނި ރައްޔިތުންނާއި ވިޔަފާރިތަކަށް އަސަރު ނުކުރާނެ ގޮތަށް މެނޭޖްކުރެވިފައިކަމަށްވެސް އަމީރު ވިދާޅުވިއެވެ.
" މި ދަތިތަކާއެކުވެސް ރާއްޖޭގެ ތާރީހުގައި ސަރުކާރަކުން ނުކުރާ މަސައްކަތްތައް ރަށް ރަށުގައި އޮންނާނީ ހިންގާފަ. - ފެނާއި ނަރުދަމާ - މަގުތައް - އެއަޕޯޓްތައް - ބަނދަރުތައް - ބިން ހިއްކުން - ހާހުން ހައުސިން ޔުނިޓްތައް އެޅުން - ބްރިޖް އަޅަން ފެށުން - އެސްޑީއެފްސީ މެދުވެރިކޮށް ކުދި އަދި މެދު ފަންތީގެ އެތައް ވިޔަފާރިއެއް އަލަށް ފެށުން - މަސްވެރިކަން ތަރައްޤީކުރަން އިންވެސްޓްކުރުން." އަމީރު މި ސަރުކާރަށް ފާޑުވިދާޅުވެ އެކްސްގައި ކުރެއްވި ޕޯސްޓުގައިވެއެވެ.
އަމީރު ވަނީ މިދިޔަ ސަރުކާރުން ނެގި ދަރަންޏާއި ޗާޕުކުރި ފައިސާގެ ވާހަކަތައް ތަފްސީލުކޮށް ކިޔާދިނުމަށް މަޖިލިސްއަށް އޭނާ ހާޒިރުކޮށް ސުވާލުކުރުމަށް ގޮވާލާފައެވެ.
" މޮޅު ވާހަކަ ނުދައްކާ މަޖްލިސްއަށް ގެންދަން ވީނު، މުޅި މަޖްލިސް ކޮމިޓީއަކަށް. ތި ބޭފުޅުންގެ 87 މެމްބަރުންނާއި، ވަޒީރުންނާއި އަދިވެސް ގެންދަން ބޭނުން އެންމެން ގެންދާނީ. މާލީ އިޤްތިސާދީ ސިޔާސަތު ހިންގި ގޮތާއި، ކާރިސާތަކާއެކު ގެނެވުނު ބަދަލުތަކާއި ދަރަނި ނަގަން ޖެހުން ގޮތާއި، ތި ކިޔާ ފައިސާ ޗާޕްކުރުމާއި، ހުރިހާ ވާހަކަތަކެއް ރަނގަޅަށް ދައްކާލަން. މިހާރު ތި ދޮގުތަކުގެ ތަފްސީލް ރައްޔިތުންނަށް ސާފްވާން އެބަ ޖެހޭ. އަމީރު އެކްސްގައި ކުރި ޕޯސްޓުގައިވެއެވެ.
ކޮވިޑްގެ ދުވަސްވަރު ދަށަށް ދިޔަ އިގްތާސާދާއެކު، އާމްދަނީ ދަށަށް ދިޔުމުން ދަރަނި ނަގަން ޖެހުނުކަނަށް ފާހަގަކުރައްވަމުން އައިމީރު ވިދަޅުވީ މި ސަރުކާރުން ފާހަގަކުރަމުން އަންނަ 56 ބިލިއަނުން 19 ބިލިއަން އަކީ ކޮވިޑާއެކު އިތުރުވި ދަރަނިކަމަށެވެ. އަދި މި ސަރުކާރުން ދެ އަހަރުގެ ތެރޭގައި އެއަށް ވުރެ ގިނަ ދަރަނި ނަގާފައިވާކަމަށް އަމީރު ވިދާޅުވިއެވެ.
" ބާކީ 37 ބިލިއަން އެވަރު ތި ބޭފުޅުންގެ ސަރުކާރުގެ 2 އަހަރު ނުވަނީސް މިހާރު އިތުރު ވެއްޖެ. ކުރި ކަމެއް، ހިންގި ޕްރޮޖެކްޓެއް ފެންނަ މީހެއް މި ޤައުމަކު ނެތް. އަޅުގަނޑުމެންނާއި ކުރިމަތިލާން ޖެހުނު ދަތިތަކުން، އަޅުގަނޑުމެން އަރައިގަތީ ރައްޔިތުންނާއި ވިޔަފާރިތައް ސަލާމަތްކޮށްގެން. އެއާއެކު ދެން ގެންނަންޖެހޭނެ ރިފޯމްތައް ދަނެގެން، ތައްޔާރުވެތިބެ." އަމީރު ވިދާޅުވިއެވެ.
