މިއަދު ހެނދުނު މަރަދޫފޭދޫއަށް ވަނީ ވަރަށް ބޯކޮށް ވާރޭވެހި، ވައިގަދަވުމުގެ ސަބަބުން އެތަކެއް ގެއްލުންތަކެއް ވެފައެވެ. މިގޮތުން ގޭގޭގެ ފާރުތަކުގެ ބައިބައި ވެއްޓުމާއި، ގޭގޭގެ ފުރާޅު އެއްލާލުން ފަދަ ކަންކަން ހިމެނެއެވެ. މި ހާދިސާ ނަގޫރޯޅިއެއް ކަމަށް އެ ރަށުގެ ބައެއް މީހުން ބުނަމުންދާއިރު، މެޓް އޮފީހުން މިކަން ދޮގުކުރެއެވެ.
މިހާދިސާގައި ގެއްލުންވި ގޭގޭގެ ހާލަތު ބަލައި ދެނެގަތުމުގެ މަސައްކަތް ކައުންސިލުން ދަނީ ކުރަމުންނެވެ.
މުޅި ރާއްޖޭގެ މޫސުން މިވަގުތު އެހާ ގޯހެއް ނޫން ނަމަވެސް، ވައި ތަންކޮޅެއް ގަދަކޮށް އުޅޭ ކަމަށް މެޓް އޮފީހުން ބުނެއެވެ. އާންމުކޮށް ވައި ޖެހެމުންދަނީ ގަޑިއަކު 13 މޭލާއި 30 މޭލާ ދެމެދުގެ ބާރު މިނުގައެވެ. މެޓް އޮފީހުން ލަފާކުރާ ގޮތުގައި ކުރިއަށް އޮތް ވަގުތުތަކުގައި ބޮޑު ވިއްސާރައެއް ނުވާނެއެވެ. ނަމަވެސް ކެރިކޮޅެއް އަތުވެދާނެ ކަމަށާއި، ކަނޑުތައް އާދައިގެ ވަރަކަށް ގަދަވެ، ވައިވެސް ގަދަވާނެ ކަމަށް ލަފާކުރެއެވެ.
