ފޮރިން މިނިސްޓްރީން ބުނީ، ކަތަމަންޑޫގެ ގިނަ ސަރަޙައްދުތަކެއްގައި ކާފިއު އިޢުލާންކޮށްފައިވާ ކަމަށާއި، މި ނާޒުކު ދަނޑިވަޅުގައި ދިވެހި ރައްޔިތުންގެ ސަލާމަތާއި ރައްކާތެރިކަމަށް ހާއްސަ ސަމާލުކަމެއް ދިނުމަށް އެދޭކަަމަށެވެ.
ކާފިއު އިއުލާންކޮށްފައިވާ ސަރަޙައްދުތަކުގައި ޒަރޫރީ ބޭނުންތަކަށް މެނުވީ މަގުމައްޗަށް ނުނިކުތުމަށްވެސް އެދިފައިވެއެވެ.
ނޭޕާލުގައި ތަޢުލީމު ހާސިލުކުރަމުންދާ ދިވެހި ދަރިވަރުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، އެ ޤައުމުގެ ކަމާގުޅޭ އިދާރާތަކާ މަޝްވަރާކޮށް، ބޭނުންވާ ލުއިފަސޭހަތައް ހަމަޖައްސައިދިނުމަށް އިންޑިއާގައި ހުންނަ ދިވެހިރާއްޖޭގެ ހައިކޮމިޝަނުންނާއި ފޮރިން މިނިސްޓްރީން މަސައްކަތްކުރަމުންދާ ކަމަށްވެސް ބުންޏެވެ.
ނޭޕާލުގެ ހާލަތު ގާތުން ބަލަމުންދާ ކަމަށާއި، ހާލަތު އިތުރަށް ގޯސްވެއްޖެނަމަ، ނޭޕާލުގައި ތިއްބެވި ދިވެހި ރައްޔިތުންނަށް އެހީތެރިކަން ފޯރުކޮށްދޭނެކަމުގެ ޔަޤީންކަންވެސް ވަނީ އަރުވާފައެވެ. އެއްވެސް އެހީތެރިކަމެއް ބޭނުންފުޅުވާނަމަ، އިންޑިއާގައި ހުންނަ ދިވެހިރާއްޖޭގެ ހައިކޮމިޝަނާ ގުޅަން ވެސް އެ މިނިސްޓްރީން ވަނީ އެދިފައިވެއެވެ.
