އަމިއްލަ މީހުން އަޅައިދޭ މިސްކިތްތައް 2 އަހަރުތެރޭ ނިންމަންޖެހޭ ގޮތަށް ކަނޑައަޅާ އިސްލާމިކް މިނިސްޓްރީން އުސޫލެއް އެކުލަވާލައިފިއެވެ.
Advertisement
އެ މިނިސްޓްރީން ބުނީ އެ ސިޔާސަތު ކަނޑައެޅީ އަމިއްލަ ފަރާތްތަކުން ވޭތުވެ ދިޔަ އަހަރުތަކުގައި މިސްކިތް އެޅުމަށް ތަންތަނުން ބިން ހޯދުމަށް ފަހު މަސައްކަތް ނުފަށައި ނުވަތަ މަސައްކަތް ނުނިންމައި އެތައް އަހަރެއް ވަމުންދާތީވެ، މިކަމުގެ ސަބަބުން ރައްޔިތުން ނަމާދުކުރުމަށް އެކި ސަރަހައްދުތަކުގައި ނުހަނު ތަކުލީފު އުފުލަމުންދާތީވެ، ކުރިއަށް އޮތްތަނުގައި މިކަމަށް ހައްލު ހޯދުމަށްޓަކައިކަމަށެވެ.
ސިޔާސަތުގައި ހިމަނާފައިވާ ކަންކަން
- މިސްކިތް އަޅަން އެދި ހުށަހަޅާ އަމިއްލަ ފަރާތްތަކަށް މިސްކިތް އަޅައި ނިންމުމަށް 2 އަހަރަށް ވުރެ ގިނަ މުއްދަތު ނުދިނުން.
- -ހަ މަސްދުވަހުގެ ތެރޭ މަސައްކަތް ފަށަން ލާޒިމުވުން. މި މުއްދަތުގައި މަސައްކަތް ނުފަށައިފި ނަމަ ބިން އަތުލުން.
- -އެއްވެސް ބައެއްގެ އަމިއްލަ އިދާރީ މަސައްކަތްތަކެއް މިސްކިތުގައި ނުހިންގުން.
- އަމިއްލަ މުދާ ގުދަން ކުރުން ފަދަ ކަންކަން ނުކުރުން.
- މިސްކިތް ބިނާކުރުމަށް ފަހު ސަރުކާރާ ޙަވާލުކުރުން.
- މިސްކިތް އެޅުމަށް ބޭނުންވާ ފައިސާ ހުރިކަމުގެ ނުވަތަ މަސައްކަތް ފަށާއިރު ބޮޑު ބައެއް ހުރިކަމާއި ނިންމަން ބޭނުންވާ ފައިސާ ލިބޭނެކަން ކަށަވަރުކުރުން.
އަމިއްލަ ފަރާތްތަކުން މިސްކިތް އަޅަން އެދުމުން އެކަމަށް ބިން ދި ސަރުކާރުން އަންނަނީ އެ މަސައްކަތް ކުރުމުގެ ހުއްދަ ދެމުންނެވެ.
