އިއްޔެ އިންޑިއާގެ މުމްބާއީގައި ހުންނަ ކޮކިލާބޭން ދިރުބާއީ އަމްބާނީ ހޮސްޕިޓަލުގެ އައިސީޔޫގައި އިރްފާނަށް ފަރުވާދޭން ފެށީ ހަޖަމްކުރާ ނިޒާމުގައި އިންފެކްޝަނެއް އުފެދިގެންނެވެ.
މިއަދު ހެނދުނުގެ ވަގުތެއްގައި އިރްފާން މަރުވިއިރު އޭނާގެ މަންމަ، ސައީދާ މިދިޔަ ހޮނިހިރު ދުވަހު ވަނީ ޖެއިޕޫރުގައި މަރުވެފަ އެވެ. އެކަމަކު ދަތުރުފަތުރުކުރުން މަނާވެފައިވުމުން އިރްފާނަށް އޭނާގެ މަންމަގެ ޖަނާޒާގައި ބައިވެރިވެވޭ ގޮތެއް ނުވެ އެވެ.
މަންމަ މަރުވިތާ ހަތަރުވަނައަށްވީ ދުވަހު އިރްފާން މަރުވެފައިވާތީ ގިނަ ބަޔަކު ދަނީ މިއީ އުނދަގޫ ދަނޑިވަޅެއް ނަމަވެސް ކެތްތެރިވުމަށް އޭނާގެ އާއިލާގެ ކިބައިން އެދެމުންނެވެ.
"މަދުން ނޫނީ ނުފެންނަ" ކެންސަރު ބައްޔެއްގެ ޝިކާރައަށްވިކަން އިރްފާން ހާމަކުރީ 2018 ވަނަ އަހަރު އެވެ. މިއާއެކު ދެ އަހަރު ދުވަހު، ފިލްމީ ދާއިރާއާ ދުރަށް ޖެހިލިއިރު އޭނާ އެނބުރި އައިސް ސަޕޯޓަރުންނާއި ބައްދަލުކުރިތާ އަދި މާ ދުވަހެއް ނުވެ އެވެ. މިދިޔަ މާޗު މަހުގެ 20 ގައި ނެރުނު ފިލްމު "އަނގްރޭސީ މީޑިއަމް" އިން އުމުރުން 53 އަހަރުގެ އިރްފާން އެންމެ ފަހުން ފެނިގެންދިޔައިރު އެ ފިލްމަކީ ކާމިޔާބު ފިލްމެކެވެ.
