އެމަނިކުފާނު ވިދާޅުވީ ރަޖިސްޓްރީ ކުރެވިފައިވާ މީޑިއާއަކުން ހިންގާ އިންސްޓަގްރާމް، ފޭސްބުކް އަދި ޓްވިޓާ ފަދަ ސޯޝަލް މީޑިއާ އެކައުންޓުތަކުގައި ހިއްސާކުރާ ހަބަރާއި މައުލޫމާތަށް އެ މީޑިއާއަކުން ޒިންމާ ނަގަންޖެހޭނެ ކަމަށެވެ.
މީޑިއާ ބިލާ ގުޅޭގޮތުން ބޭއްވި ފޯރަމެއްގައި ވާހަކަ ދައްކަވަމުން މިނިސްޓަރު އަސްވާޑު ވަނީ މި ބިލަކީ އާންމުންނާއި އަމިއްލަ ގޮތުން ކޮންޓެންޓް އުފައްދާ ފަރާތްތަކަށް އަމާޒުކުރެވިފައިވާ ބިލެއް ނޫންކަން ފާހަގަކުރައްވާފައެވެ. އޭނާ ވިދާޅުވީ، ސޯޝަލް މީޑިއާގައި ކޮންޓެންޓް ހަދާ ޒުވާނުންނާއި އާންމު ފަރާތްތަކުން ކުރާ ޕޯސްޓުތަކާއި ދައްކާ ވާހަކަތަކަކީ މި ބިލާ އެއްވެސް ގުޅުމެއް ހުރި ކަންކަމެއް ނޫން ކަމަށާއި، އެފަދަ ފަރާތްތައް ކަންބޮޑުވާންޖެހޭ އެއްވެސް ކަމެއް ނެތް ކަމުގެ ޔަގީންކަން ދެއްވާފައެވެ.
އެހެންކަމުން، ރަޖިސްޓްރީ ކުރެވިފައިވާ މީޑިއާއަކުން ހިންގާ ސޯޝަލް މީޑިއާ އެކައުންޓެއް މެދުވެރިކޮށް ހިއްސާކުރާ ކޮންމެ މައުލޫމާތަކީ އެ މީޑިއާގެ ޒިންމާއެއް ކަމަށާއި، އެކަންކަން ބިލުގެ ދަށުން ބެލޭނެ ކަމަށް މިނިސްޓަރު އަސްވާޑު ވިދާޅުވިއެވެ.
