މި މައްސަލައާ ގުޅިގެން ހައްޔަރުކޮށްފައިވަނީ އުމުރުން 29 އަހަރުގެ މުހައްމަދު ނާޒިޝް ނާސިމް އާއި އުމުރުން 18 އަހަރުގެ ނާއީމް އަބްދުއްރަޝީދު އެވެ. އެ ދެމީހުންގެ އަތުން މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ނުވަ ރަބަރު ޕެކެޓު ފެނިފައިވެ އެވެ.
ފުލުހުން ބުނީ، މި ހާދިސާ ހިނގާފައިވަނީ އިއްޔެ ހުޅުމާލެ ފޭސް 1 ގައި ޕެޓްރޯލުކުރަމުން ދިޔަ ފުލުހުންނަށް، ކަންނެލި ޖެޓީ ސަރަހައްދުން ސައިކަލެއްގައި ދިޔަ ދެމީހެއްގެ އަމަލުތަކާމެދު ޝައްކު އުފެދުމުން ކަމަށެވެ. ފުލުހުން މަޑުކުރުމަށް އެންގުމުން އެމީހުން މަޑުނުކޮށް ސައިކަލުގައި ދުއްވާފައި ގޮސްފައިވާ ކަމަށް ފުލުހުން ބުންޏެވެ. އެމީހުންގެ ފަހަތުން ފުލުހުން ގޮސް އެ ދެމީހުން ހުއްޓުވާފައިވަނީ ސައިމާ ހިނގުން ފްލެޓްތައް ހުންނަ ސަރަހައްދުންނެވެ.
އެ ދެމީހުން ހުއްޓުވައި ބަލައިފާސްކުރިއިރު މަސްތުވާތަކެތި ފެނުމާ ގުޅިގެން އެމީހުން ހައްޔަރުކޮށް، އެމީހުން ދުއްވި ސައިކަލު ވަނީ ޓޯކޮށްފަ އެވެ. މި މައްސަލައާ ގުޅިގެން އެ ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ވަނީ ފަސް ދުވަހުގެ މުއްދަތަށް ބަންދުކުރުމަށް އަމުރުކޮށްފަ އެވެ. ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
