ރައްޔިތުންގެ މަޖިލީހުގެ ކޮމިޓީ ބައްދަލުވުންތަކަށް ހާޒިރުވާ މީހުން، މަޖިލީހުގެ މަސައްކަތަށް ހުރަސްއަޅައިފިނަމަ ފިޔަވަޅު އެޅޭނެ ގޮތަށް ގަވާއިދު އިސްލާހުކުރަން ރިޔާސަތުން ނިންމައިފި އެވެ.
Advertisement
މިކަން އިއުލާން ކުރެއްވީ މަޖިލީހުގެ ނައިބު ރައީސް އަހުމަދު ނާޒިމް، އިއްޔެ ބޭއްވި ދައުރުން ބޭރުގެ ޖަލްސާގަ އެވެ. މި ނިންމުން ނިންމާފައިވަނީ މީޑިއާ ބިލް ދިރާސާކުރި ކޮމިޓީގައި ނޫސްވެރިން އިހުތިޖާޖު ކުރުމާ ގުޅިގެންނެވެ.
ނާޒިމް ވިދާޅުވީ، "މީޑިއާ ބިލްގެ މަސައްކަތް މިނިވަން މުއައްސަސާތަކާ ބެހޭ ކޮމިޓީން ކުރިއަށް ގެންދިޔައިރު، ބައްދަލުވުން އަޑުއަހަން ވަން ބައެއް ފަރާތްތަކުގެ އަމަލުތައް ހުރީ މަޖިލީހުގެ މަސައްކަތަށް ހުރަސްއެޅޭ ގޮތަށް، ކަމަށެވެ. އޭނާ ވިދާޅުވި ގޮތުގައި އެ ފަރާތްތަކުން ވަނީ މަޖިލީހުގެ ކަރާމަތަށް އުނިކަން އަންނަ ގޮތަށާއި އަހުލާގީ މިންގަނޑުތަކާ ހިލާފަށް އަމަލުކޮށްފަ އެވެ. މިކަމާ ގުޅިގެން މަޖިލީހުގެ ސާޖަންޓް އެޓް އާމްސް ވަނީ ރިޕޯޓެއް ވެސް ހުށަހަޅާފައިވާ ކަމަށް ނާޒިމް ފާހަގަކުރެއްވި އެވެ.
މި މައްސަލަ މަޖިލީހުގެ އާއްމު ކޮމިޓީއަށް ފޮނުވަން ރިޔާސަތުން ގަސްދުކުރާ ކަމަށް ނާޒިމް ވިދާޅުވި އެވެ. އެއީ ކުރިމަގުގައި މިފަދަ ކަމެއް ތަކުރާރުވިޔަ ނުދިނުމަށްޓަކައި މަޖިލީހުގެ ގަވާއިދު އިސްލާހުކުރުމަށެވެ. މި އިސްލާހުގެ ދަށުން، މަޖިލީހުގެ މެހެމާނުންގެ ގޮތުގައި ހާޒިރުވާ ފަރާތްތަކުން އަމަލުކުރަންޖެހޭނެ އުސޫލެއް ކަނޑައަޅައި، އެ އުސޫލުތަކާ ހިލާފުވެއްޖެނަމަ އަޅާނެ ފިޔަވަޅުތައް ގަވާއިދުގައި ބަޔާންކުރާނެ އެވެ.
