ރައްޔިތުންގެ މަޖިލީހުން ފާސްކުރި މީޑިއާ ރެގިއުލޭޓަރީ ބިލަކީ ގާނޫނީ އިޖުރާއަތުތަކާ ހިލާފަށް، އަދި މިހާތަނަށް ނުދެކޭފަދަ އަވަސް މިނެއްގައި ފާސްކޮށްފައިވާ ބިލެއް ކަމަށް ޓްރާންސްޕޭރެންސީ މޯލްޑިވްސް އިން ބުނެފިއެވެ.
Advertisement
އެ ޖަމިއްޔާއިން ވަނީ ނޫސްވެރިކަމުގެ މިނިވަންކަމަށް ބުރޫ އަރާނެ ކަމަށް ގިނަ ބަޔަކު ބުނަމުންދާ މި ބިލު ތަސްދީގުނުކުރުމަށް ރައީސް ޑރ. މުހައްމަދު މުއިއްޒުއަށް ގޮވާލާފައެވެ.
ޓްރާންސްޕޭރެންސީން މިކަން ހާމަކުރީ ނޫސްވެރިންނާއި މަދަނީ ޖަމިއްޔާތަކުގެ ކަންބޮޑުވުންތަކަށް އަޅާނުލާ، މަޖިލީހުން މި ބިލު ފާސްކުރުމާ ގުޅިގެން ނެރުނު ބަޔާނެއްގައެވެ.
ޓްރާންސްޕޭރެންސީން ފާހަގަކުރި ގޮތުގައި، މި ބިލު ފާސްކުރުމުގެ މަރުހަލާގައި މަޖިލީހުން ވަނީ 151 ނޫސްވެރިން ސޮއިކޮށް ހުށަހެޅި ޕެޓިޝަނަށް އެއްވެސް ސަމާލުކަމެއް ދީފައެއް ނުވެއެވެ. އަދި ނޫސްވެރިންނާއި، މަދަނީ ޖަމިއްޔާތަކާއި، އިންޓަނޭޝަނަލް ޖަމާއަތްތަކުގެ އިތުރުން އާންމު ރައްޔިތުން ފާޅުކުރި ކަންބޮޑުވުންތައް އެއްފަރާތްކޮށް، ގާނޫނުގައި ކަނޑައަޅާފައިވާ އިޖުރާއަތްތަކަށް އަމަލުނުކޮށް ބިލު ކުރިއަށް ގެންގޮސްފައިވާ ކަމަށް އެ ޖަމިއްޔާއިން ބުންޏެވެ. މި ބިލުގެ ސަބަބުން ނޫސްވެރިކަމުގެ މިނިވަންކަމާއި ހިޔާލުފާޅުކުރުމުގެ މިނިވަންކަމަށް ނުރައްކާތެރި ބިރެއް ކުރިމަތިވާނެ ކަމަށް ވެސް ޓްރާންސްޕޭރެންސީގެ ބަޔާނުގައި ފާހަގަކޮށްފައިވެއެވެ.
މި ބިލާ ދެކޮޅަށް ނޫސްވެރިން ކުރި މުޒާހަރާގެ ތެރެއިން ފުލުހުން ހާލަތާ ނުބައްދަލު ބާރުގެ ބޭނުންކޮށް، ނޫސްވެރިން ހައްޔަރުކުރިކަން އެ ޖަމިއްޔާއިން ވަނީ ހަރުކަށި އިބާރާތުން ކުށްވެރިކޮށްފައެވެ. އަދި ހައްޔަރުކުރި ހުރިހާ ނޫސްވެރިން ވަގުތުން ދޫކޮށްލުމަށާއި، ފުލުހުން ބާރުގެ ބޭނުންކުރި މައްސަލަ ނޭޝަނަލް އިންޓެގްރިޓީ ކޮމިޝަނުން ތަހުގީގުކުރުމަށް ވެސް ޓްރާންސްޕޭރެންސީން ވަނީ ގޮވާލާފައެވެ. މީގެ އިތުރުން، ބިލު ފާސްކުރުމުގައި ހިނގާފައިވާ އިޖުރާއީ އޮޅުންތައް ތަހުގީގުކުރުމަށް ވެސް މަޖިލީހަށް ވަނީ ގޮވާލާފައެވެ.
