އިންޑިއާގެ ޕްރައިމް މިނިސްޓަރު ނަރެންދުރަ މޯދީގެ 75 ވަނަ އުފަންދުވަހާ ދިމާކޮށް، ސިޔާސީ އަދި ފަންނީ ދާއިރާގެ ގިނަ ބަޔަކު ދަނީ ސޯޝަލް މީޑިއާ މެދުވެރިކޮށް ތަހުނިޔާ ކިޔަމުންނެވެ.
Advertisement
މި ގޮތުން، މަޝްހޫރު ޓީވީ ސިލްސިލާ "އަނޫޕަމާ" އިން މަގުބޫލުކަން ހޯދާފައިވާ އެކްޓްރެސް ރުޕާލީ ގެންގަލީ ފޮނުވާފައިވާ ހާއްސަ މެސެޖު ގިނަ ބައެއްގެ ސަމާލުކަމަށް އައިސްފައިވެއެވެ.
ރުޕާލީ ބުނީ، "ޕްރައިމް މިނިސްޓަރު މޯދީއަކީ ތިން ޖީލެއްގެ މީހުންގެ ލޯތްބާއި އިހުތިރާމް ހޯއްދަވާފައިވާ ވަރަށް މަދުން ނޫނީ ނުފެންނަ ފަދަ ލީޑަރެއް،" ކަމަށެވެ. އޭނާ ފާހަގަކުރި ގޮތުގައި ދުވަސްވީ މީހުންނާއި، ޒުވާނުންނާއި، އަދި ކުޑަކުދިންވެސް މޯދީއަށް އެއް ހަމައެއްގައި ލޯބިކޮށް އިހުތިރާމް ކުރާ ކަމަށެވެ. އަދި މޯދީގެ ސަބަބުން ދުނިޔޭގެ އެކި ކަންކޮޅުތަކުގައި އިންޑިއާގެ ދިދަ ފަހުރާއެކު ވިދާލާފައިވާ ކަމަށާއި، ކޮންމެ އިންޑިއާ ރައްޔިތަކަށް ގައުމު އަމާންކަމާއި އިހުތިރާމާއެކު ދެމިއޮތް ކަމުގެ ޔަގީންކަން ލިބިފައިވާ ކަމަށްވެސް އޭނާ ބުންޏެވެ.
އޭނާގެ ދިގު މެސެޖުގައި، އިންޑިއާގެ ރައްޔިތުންގެ އުންމީދުތައް ގެއްލެން ފެށި ދަނޑިވަޅެއްގައި އެ ގައުމުގެ ހަގީގީ ބާރު މޯދީ ހަނދާންކޮށްދެއްވި ކަމަށް ރުޕާލީ ވަނީ ބުނެފައެވެ. އަދި މޯދީ ވެރިކަމާ ހަވާލުވެވަޑައިގެންނެވި ފަހުން ގައުމަށް އާ ހިތްވަރަކާއި ހަކަތައެއް ގެނެސްދެއްވާފައިވާ ކަމަށްވެސް އޭނާ ފާހަގަކުރި އެވެ. ސިޔާސީ ދާއިރާއަށްވެސް ވަދެފައިވާ ރުޕާލީ ވަނީ މޯދީއަށް ޝުކުރު އަދާކޮށް، ހަމަ އެ ހިތްވަރާއި ރޫހާއެކު އިންޑިއާއަށް މަގުދައްކަވަމުން ގެންދެވުމަށް އެދިފައެވެ.
